Metfjöldi íslenskra fyrirtækja á stærstu ferðasýningu í heimi

Metfjöldi íslenskra fyrirtækja er nú staddur í Berlín á ITB ferðasýningunni sem er sú stærsta sinnar tegundar í heiminum.  Allra jafna sækja hana um 170.000 gestir þar af um 110.000 fagaðilar. Auk þess að vera stærsta ferðasýning í heimi er ITB jafnframt einn stærsti vettvangur ráðstefna, funda og fræðslu um þróun og nýjungar í ferðaþjónustu á heimsvísu.

Það er Íslandsstofa sem heldur utan um skipulagningu Íslandsbássins en að þessu sinni 29 íslensk ferðaþjónustufyrirtæki og þrjár markaðs­stofur landshluta þátt undir merkjum Inspired by Iceland. Aldrei hafa fleiri íslenskir aðilar tekið þátt á Íslandsbásnum og eru yfir eitt hundraða Íslendingar á svæðinu. Meðal sýnenda á íslenska básnum eru ferðaskrifstofur, hótel, flugfélag og afþreyingar­fyrirtæki. Unnið er að markmiðum í íslenskri ferðaþjónustu þar sem lögð er áhersla á að hvetja ferðamenn og erlenda ferðaheildsala til þess að kynna sér ferðaþjónustu um land allt, árið um kring með ábyrgð og öryggi að leiðarljósi.

Íslenska forsetafrúin, frú Eliza Reid, heiðraði sýnendur og gesti Íslandsbássins með nærveru sinni á fyrsta degi ITB og í hádeginu í dag hélt hún inngangsávarp á ráðstefnu um hlut kvenna í ferðaþjónustu heimsins. Benti forsetafrúin á að konur væru í framvarðasveit íslenskrar ferðaþjónustu. Þannig væri ráðherra ferðamála kona og sömuleiðis formaður Samtaka ferðaþjónustunnar.

Í tengslum við ITB bauð Íslandsstofa í samráði við íslenska sendiráðið í Berlín fulltrúum sérvalinna þýskra fjölmiðla til viðburðar í bústað sendiráðsins þar sem frú Eliza Reid var heiðursgestur. Á fjölmiðlaviðburðinum var farið yfir áherslur í markaðssetningu á íslenskri ferða­þjónustu og hvernig ábyrgð og öryggi hafa verið sett í forgrunn í öllum markaðs­aðgerðum Íslandsstofu og samstarfsaðila úr íslenskri ferðaþjónustu í markaðsverkefninu Inspired by Iceland. Þá fór jafnframt fram kynning á íslenskum matvælum fyrsta sýningardag ITB þar sem gestum íslenska sýningarbássins var boðið að smakka íslenskan mat. Með því var vakin athygli á hágæða íslensku hráefni úr hreinu umhverfi sem ferðamenn geta notið í Íslands­ferðinni og hvernig matur getur orðið hluti af upplifun ferðamanna.