Það var fyrst í júlí í fyrra sem WOW air birti afkomu sína fyrir árið 2017 og í ljós kom að félagið tapaði 2,3 milljörðum króna. Árin tvö þar á undan var reksturinn réttum megin við núllið. Nokkrum vikum eftir að afkoman 2017 var opinberuð hófst margumrætt skuldabréfaútboð WOW og í gögnum sem því fylgdi sagði að tapreksturinn hefði haldið áfram á fyrri helmingi ársins 2018.
Aukin áhersla á sölu farmiða á dýrara farrými og hærri tekjur af aukaþjónustum áttu hins vegar að snúa rekstrinum við og hagnaður yrði á seinni hluta síðasta árs. Þó var gert ráð fyrir tapi fyrir allt árið 2018 en methagnaði á þessu ári.
Það varð þó ljóst þegar WOW birti uppgjör sitt fyrir fyrstu níu mánuðina í fyrra að viðsnúningurinn hafði ekki orðið því flugfélagið var rekið með um fjögurra milljarða króna tapi. Og ekki tók betra við síðustu þrjá mánuði ársins því samkvæmt heimildum Túrista þá nam heildartap WOW air á síðasta ári rétt um 20 milljörðum króna. Til samanburðar var tap af rekstri Icelandair Group 6,7 milljarðar kr.
Sem fyrr segir er afkoman í fyrra langtum verri en forsvarsfólk WOW air kynnti í tengslum við skuldabréfaútboð félagsins. Og við því var búist því í bréfi til eigenda skuldabréfanna, sem Skúli sendi í lok nóvember, þá segir hann að afkoman á fjórða ársfjórðungi hafi verið mun verri en gert hafi verið ráð fyrir. Ástæðurnar lágu í hækkandi olíuverði, gjaldþroti Primera Air og neikvæðri umræðu um félagið að mati forstjórans.
Eins og áður hefur komið fram þá samþykkti stjórn Icelandair Group að hefja viðræður við WOW air um aðkomu að rekstri félagsins í gærkvöld. Reiknað er með að niðurstaða liggi fyrir í síðasta lagi á mánudag.