Hollenska ferðaskrifstofan Voigt Travel og lággjaldaflugfélagið Transavia standa í sumar fyrir reglulegum flugferðum milli Akureyrar og Rotterdam. Í dag var fyrsta ferðin af sextán á dagskrá og af því tilefni var tilkynnt að átta ferðir í viðbót verði í boði til Akureyrar í vetur en þá frá Amsterdam.
Í dag kosta ódýrstu flugmiðarnir í sumar, báðar leiðir, með Transavia frá Akureyri til Rotterdam um 50 þúsund krónur. Oftast er fargjaldið þó nokkru hærra. Þetta er töluverð breyting á stuttum tíma því fyrir mánuði síðan var hægt að fá farmiða á mörgum dagsetningum á rétt um 35 þúsund krónur líkt og Túristi greindi frá. Af þessari verðþróun að dæma þá hefur nýju flugleiðinni verið vel tekið.
Transavia hefur um langt skeið flogið til Íslands frá París á sumrin og í júlí hefst áætlunarflug félagsins frá Amsterdam. En sem fyrr segir hefst flug frá hollensku höfuðborginni til Akureyrar í vetur á vegum Voigt Travel og Transavia. „Sem ferðaskrifstofa þurfum við stöðugt að skapa okkur sérstöðu,“ segir Cees van den Bosch, forstjóri Voigt Travel, í tilkynningu. „Ísland hefur aldrei verið vinsælla, en aðallega fyrir stutt stopp sem viðkomustaður, og þessi magnaði áfangastaður á betra skilið en það. Þess vegna höfum við vísvitandi valið að fljúga til Akureyrar til að gera farþegum okkar kleift að ferðast strax utan alfaraleiða og taka sér tíma til að kanna landið. Norðurhluti Íslands er enn að miklu leyti ósnortinn og þar má finna alveg jafnmikið af fossum, svörtum ströndum, eldfjöllum og leirböðum og á Suðvesturlandi.“
