Fjögur stærstu flugfélög Norður-Ameríku fljúga öll hingað til lands en Delta Air Lines var fyrst þeirra til að hefja Íslandsflug og er jafnframt það eina sem flýgur hingað allt árið. Frá JFK flugvelli í New York koma þotur félagsins nefnilega allan ársins hring og á sumrin bætist við daglegt flug frá Minneapolis. Á föstudaginn er komið að fyrstu áætlunarferð ársins þaðan og þar með verða brottfarir Delta frá Keflavíkurflugvelli tvær á dag næstu mánuði.
„Alls býður Delta 5.400 flugsæti á viku milli Íslands og Bandaríkjanna í sumar, þegar eftirspurnin er hvað mest,“ segir Roberto Ioriatti, framkvæmdastjóri Atlantshafsflugs Delta Air Lines. „Við reynum að skera okkur úr með fjölbreyttum þægindum og þjónustu meðan á fluginu stendur til að gera sérhverja ferð að ánægjulegri upplifun, og þeir sem greiða lægstu fargjöldin eru þar ekki undanskildir.“
Bandaríkjamenn eru fjölmennastir erlendra ferðamanna hér á landi. Frá því í mars 2018 til febrúar á þessu ári komu 685.000 þeirra með flugi. Delta vonast til að með sumaráætlun sinni, þar með talið 193 sætum í daglegu flugi frá Minneapolis, leggi félagið sitt lóð á vogarskálarnar fyrir íslenska ferðaþjónustu samkvæmt því sem fram kemur í tilkynningu.
Icelandair hefur lengi flogið til Minneapolis og kannast ófáir Íslendingar við Mall of America, helstu verslunarmiðstöð borgarinnar. Í nágrenni við Minneapolis og systurborgina St. Paul bjóðast líka fjölbreyttir möguleikar fyrir útivistarfólk allan ársins hring. Kajaksiglingar eru vinsælar, enda státar Minnesota af 10 þúsund vötnum. Til fjalla finnast flúðasiglingar og fallahjólreiðar ásamt þúsundum kílómetra af göngustígum með stórkostlegu útsýni í kaupbæti.
Innifalið í fargjaldinu með Delta til Bandaríkjanna á öllum farrýmum eru veitingar um borð, þar á meðal máltíðir, vín, bjór, freyðivín, gosdrykkir og að sjálfsögðu úrvals þjónusta. Allir farþegar hafa aðgang að afþreyingarkerfi og geta nýtt sér ókeypis samskiptatengingar með Messenger, WhatsApp og iMessage. Hægt er að tengjast háhraða interneti gegn vægu gjaldi. Enn meiri þægindi og úrval bjóðast svo á Delta Comfort+ og DeltaOne farrýmunum segir i tilkynningu.
