28 prósent samdráttur á Kefla­vík­ur­flug­velli

Eftir fall helsta keppinautarins þá stendur Icelandair á ný undir ríflega sjö af hverju tíu brottförum til útlanda. Umferðin í síðasta mánuði var álíka mikil og í maí árið 2016.

Sumarvertíð nokkurra erlendra flugfélaga hér á landi hófst í lok maí og um leið fjölgaði áfangastöðunum sem hægt er að fljúga til beint frá Keflavíkurflugvelli. Mynd: Isavia

Umferðin um Kefla­vík­ur­flug­völl dróst veru­lega saman í síðasta mánuði því áætl­un­ar­ferðum þaðan fækkaði um ríflega sjö hundrað eða um 28 prósent. Til saman­burðar þá tóku þotur WOW air 830 sinnum á loft frá Kefla­vík­ur­flug­velli í maí í fyrra samkvæmt taln­ingum Túrista. Það sem vegur aðeins upp á móti er að brott­förum Icelandair fjölgaði um nærri tólf af hundraði í maí. Íslands­flug erlendu flug­fé­lag­anna var í nokkuð föstum skorðum en British Airways, easyJet og Norwegian drógu aðeins úr á meðan Finnair bætti við.

Þriðja hver áætl­un­ar­ferð, til og frá landinu í maí í fyrra, var á vegum WOW air og félagið skilur því eftir sig stórt skarð. Vægi flug­fé­lag­anna sem eftir standa hefur þar með gjör­breyst og þannig er hlut­deild Icelandair, í brott­förum talið, komin upp í 72 prósent sem er nákvæm­lega sama vægi og félagið hafði í maí árið 2014. Á árunum sem eftir komu lækkaði hlut­deild Icelandair hins vegar hratt á kostnað WOW air.

Að jafnaði voru farnar áttatíu áætl­un­ar­ferðir á dag frá Kefla­vík­ur­flug­velli í maí í fyrra en meðal­talið fór niður 57 brott­farir að þessu sinni. Það er álíka fjöldi og í maí árið 2016. Þann mánuð komu hingað til lands rúmlega 124 þúsund erlendir ferða­menn eða fjórð­ungi færri en í maí í fyrra. Niður­stöður í taln­ingu Ferða­mála­stofu í síðasta mánuði liggja ekki fyrir en gera má ráð fyrir að hlut­fallsleg fækkun ferða­manna sé ekki eins mikil og nemur samdrætt­inum í fluginu. Ástæðan er sú að nú er saman­lagt vægi erlendu flug­fé­lag­anna nokkru hærra og með þeim fljúga fáir tengifar­þegar. Á sama tíma hefur hlut­fall erlendra ferða­manna um borð í þotum Icelandair aukist á kostnað tengifar­þega.