Framkvæmdastjóraskipti við upphaf söluferlis

Hörður Gunnarsson lætur af starfi sem framkvæmdastjóri Iceland Travel. Ferðaskrifstofan verður seld út úr Icelandair Group.

Iceland Travel sem er einn umsvifamesta ferðaskrifstofa landsins þegar kemur að skipulagningu Íslandsferða verður sett á sölu í haust. Skjámynd: Iceland Travel

Björn Víglundsson hefur verið ráðinn framkvæmdastjóri Iceland Travel, dótturfélags Icelandair Group. Hörður Gunnarsson sem leitt hefur félagið í tæpan áratug lætur af störfum. Þetta kemur fram í tilkynningu. Þar kemur jafnframt fram að gert sé ráð fyrir að söluferli á Iceland Travel hefjist á haustmánuðum en rekstur ferðaskrifstofunnar hefur verið erfiður undanfarið vegna áframhaldandi samdráttar líkt og kom á afkomufundi Icelandair Group í vor.

„Það er ánægjulegt að fá Björn Víglundsson til starfa en hann hefur áratuga reynslu af stjórnun markaðs- og sölumála og er því vel í stakk búinn til að takast á við þær áskoranir og tækifæri sem Iceland Travel stendur frammi fyrir með því góða fólki sem þar starfar,“ segir Bogi Nils Bogason, forstjóri Icelandair í tilkynningu. „Mig langar jafnframt að þakka Herði Gunnarssyni fyrir vel unnin störf og framlag til félagsins en hann hefur byggt Iceland Travel upp farsællega síðastliðinn áratug.“ Hörður mun verða félaginu til ráðgjafar næstu mánuði.

Iceland Travel er annað dótturfélagið sem Icelandair Group setur á sölu á skömmum tíma. Fyrir tæpu ári síðan hófst söluferli á hótelfyrirtæki samsteypunnar en það hefur dregist á langinn en stefnt er að því að klára söluna fyrir lok þessa mánaðar.