Jón Karl tekur við af Andra Má

Fyrrum forstjóri Primera Air hefur tekið við stjórnartaumunum í Travelco Nordic

Jón Karl Ólafsson er nýr stjórnarformaður Travelco Nordic. Mynd: Isavia

Starfsmönnum Travelco Nordic var tilkynnt í morgun að Arion banki hefði tekið yfir rekstur Travelco Nordic, móðurfélag ferðaskrifstofuveldis Andra Más Ingólfssonar. Jón Karl Ólafsson, fyrrum forstjóri Primera Air og Icelandair, er nýr stjórnarformaður Travelco Nordic.

Ætlun Arion banka er að selja fyrirtækin eins hratt og auðið er samkvæmt því sem segir í tilkynningu. Aðspurður um hversu langan tíma það gæti tekið þá segir Jón Karl, í samtali við Túrista, að erfitt sé að segja til um það en búast megi við sex til tólf mánaða söluferli. „Ef það þarf lengri tíma þá verður það að vera svo,” segir Jón Karl.

Íslensku ferðaskrifstofurnar Heimsferðir og Terra Nova tilheyra Travelco Nordic og í fyrrnefndi tilkynningu segir að rekstur þessara tveggja fyrirtækja gangi vel. Jón Karl segir rekstur á hinum Norðurlöndunum að koma til. Þar hafi miklar breytingar verið gerðar og fyrirtækin í spennandi stöðu.

Jón Karl lét af störfum hjá Primera Air árið 2014 en nokkru síðar var rekstri flugfélagsins umbylt og fókusinn fór frá leiguflugi yfir í áætlunarflug. Sú breyting gekk hins vegar ekki upp og félagið fór í þrot síðastliðinn október. Í framhaldinu færði Andri Már Ingólfsson rekstur ferðaskrifstofa Primera Travel Group yfir í danskt dótturfélag. Það félag hefur Arion banki nú tekið yfir en bankinn tapaði um þremur milljörðum á falli Primera Air.

Samkvæmt heimasíðu Travelco Nordic þá gerir fyrirtækið ráð fyrir að fljúga með um 300 þúsund viðskiptavini til útlanda í frí á þessu ári. Um helmingurinn leggur í hann frá dönskum flugvöllum.