Samfélagsmiðlar

Lægra herbergjaverð en hærri gistitekjur

Nýting á hótelum Icelandair jókst umtalsvert í maí þrátt fyrir samdrátt í fjölda ferðamanna. Skrifast þetta helst á fleiri ráðstefnu- og hvataferðahópa. „Við þurfum einfaldlega að sjá sóknarfæri í fækkun ferðamanna," segir Hildur Ómarsdóttir hjá Icelandair hótelunum.

Gistinóttum á Icelandair hótelunum fjölgaði um 31 prósent í maí. Ferðafólki fækkaði hins vegar um 24 prósent.

Þó erlendu ferðafólki hér á landi hafi fækkað um nærri fjórðung í maí þá jókst herbergjanýtingin á hótelum Icelandair umtalsvert í mánuðinum eða úr 73 prósentum í 83 prósent. Þetta mátti sjá í mánaðarlegum flutningatölum Icelandair Group sem birtar voru fyrir helgi og vakti þessi aukna nýting athygli meðal fagfólks í ferðaþjónustu. Þróunin var nefnilega önnur á mörgum öðrum hótelum samkvæmt viðmælendum Túrista.

„Það er rétt að við náðum góðri nýtingu í maímánuði hjá Icelandair hótelum. Sérstaklega fyrir tilstillan aukningar í ráðstefnu- og hvataferðahópum. Verðlagning hótelanna er í höndum tekjustýringar sem lagar verð að framboði og eftirspurn hverju sinni. Þannig lækkaði meðalverð í maí mánuði hjá okkur um 6 prósent miðað við maí í fyrra en gistitekjur hækkuðu engu að síður um 8 prósent, sem er einstaklega ánægjulegur árangur í harðnandi umhverfi,“ segir Hildur Ómarsdóttir, forstöðumanns þróunar- og markaðssviðs Icelandair hótelanna, í svari til Túrista.

Hún segir fjölgun gesta í ráðstefnu- og hvataferðum vera í takt við stefnu fyrirtækisins um fleiri betur borgandi ferðamenn. Þetta séu hópar sem dvelja lengur, greiða hærra gistiverð og nýta sér aðra þjónustu t.d. fundaraðstöðu, veitingastaði og afþreyingu.

Herbergjanýtingin jókst ekki aðeins á Icelandair hótelunjum í Reykjavík heldur líka á landsbyggðinni og samtals var söluaukningin í gistinóttum talið nærri þriðjungur í maí. „Viðskiptin koma ýmist beint til okkar erlendis frá og mikið til í gegnum öfluga sölukanala Hilton Worldwide, en þrjú af sex hótelum í Reykjavík eru með sérleyfi á notkun vörumerkjanna þeirra,“ segir Hildur.

Stóran hluta af fækkun ferðamanna í maí má rekja til falls WOW air en félagið stóð til að mynda fyrir nærri átta hundruð áætlunarferðum til landsins í maí í fyrra. Hildur segir hins vegar að fram til þessa hafi brotthvarf flugfélagsins ekki haft teljandi áhrif á eftirspurn eða nýtingu hjá Icelandair hótelunum. „Við tökum engu að síður undir eftirsjá af flugfélaginu á markaði.“

Hildur segir góðan gang í bókunum um þessar mundir og horfur góðar fyrir komandi sumarvertíð. „Fyrirséður aukinn samdráttur í flugi til landsins í haust er hinsvegar áhyggjuefni fyrir komandi vetur,“ segir Hildur og segir mikilvægt að hagsmunaðilar snúi bökum saman nú þegar harðnar á dalnum. Það verði til dæmis gert, að hennar mati, með mótun markvissar stefnu um uppbyggingu áfangastaðarins og í framhaldinu markaðssetningu með samhljómi við setta stefnu. „Við þurfum einfaldlega að sjá sóknarfæri í fækkun ferðamanna til landsins og leita leiða til að hámarka viðskiptin með því að sækja markvisst á nýja markhópa og standa undir væntingum þeirra.“

Söluferli Icelandair hótelanna sem hófst síðastliðið sumar hefur dregist á langinn en áformað er að ljúka því í síðasta lagi í lok þessa mánaðar. Icelandair mun þó áfram eiga fimmtungshlut í fyrirtækinu samkvæmt því sem fram kom í tilkynningu frá fyrirtækinu í vor.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …