Norð­ur­strand­ar­leið opnuð

Þriðji mest spennandi áfangastaður ársins í Evrópu hefur nú formlega verið tekinn í gagnið.

Mynd: Markaðsstofa Norðurlands

Norð­ur­strand­ar­leið, eða Arctic Coast Way á ensku, var opnuð form­lega í gær á bæði Hvammstanga og Bakka­firði. „Leiðin hefur verið í þróun í meira en þrjú ár og því afar ánægju­legt að þessum áfanga hafi verið náð í dag. Sem kunnugt er hefur leiðin þegar vakið mikla athygli erlendis þrátt fyrir að hafa ekki verið form­lega opnuð, sem sést best í því að Lonely Planet valdi leiðina sem þriðja besta áfanga­stað í Evrópu á þessu ári,” segir í tilkynn­ingu frá Mark­aðs­stofu Norð­ur­lands.

Sigurður Ingi Jóhannsson, samgöngu­ráð­herra og Arnheiður Jóhanns­dóttir, fram­kvæmda­stjóri Mark­aðs­stofu Norð­ur­lands, klipptu á borða við afleggj­arann inn á Hvammstanga og opnuðu þannig leiðina form­lega. Það sama gerðu Stein­grímur J. Sigfússon, forseti Alþingis og Árni Bragi Njálsson, full­trúi sveit­ar­stjórnar Langa­nes­byggðar við afleggj­arann inn á Bakka­fjörð.

Við opnunina voru ný skilti vígð, sem marka Norð­ur­strand­ar­leið og segja ferða­mönnum hvenær þeir ferðast eftir henni. Þessi skilti marka þátta­skil í íslenskri ferða­þjón­ustu, því í fyrsta sinn eru komin upp skilti með brúnum lit. Sá litur er þekktur erlendis fyrir skilti sem tengjast ferða­þjón­ustu.

Ný heima­síða hefur sömu­leiðis verið sett í loftið og þar má nú sjá allt það helsta sem hægt er að sjá og gera á leið­inni.