Þegar forstjórar helstu flugfélaga heims hittust á ársfundi IATA, alþjóðasamtaka flugfélaga, nú í ágúst kusu þeir samtökunum nýja stjórn. Í henni eiga 29 karlar sæti en bara ein kona. Skýringin á þessum ótrúlega kynjahalla er einfaldlega sú að konurnar í forstjórastólum flugfélaganna eru örfáar. Og þeim fer fækkandi eftir nýleg forstjóraskipti í bresku flugfélögunum Flybe og þar á undan easyJet.
Þróunin er önnur þegar kemur að því að stýra farþegaþotum því konum í stétt flugmanna og flugstjóra fer fjölgandi. Það er þó aðeins komið upp í rúmlega fimm af hundraði á heimsvísu. Hjá Icelandair er hlutfallið miklu hærra eða þrettán prósent og ekkert annað vestrænt flugfélag státar af álíka. Þannig er vægi kvenkyns atvinnuflugmanna á launaskrá hjá Lufthansa og United Airlines rétt um átta prósent en þau félög standa næstbest á þessu sviði samkvæmt úttekt sem Forbes tímaritið birti í fyrra.
Að sögn Lindu Gunnarsdóttur, yfirflugstjóra Icelandair, þá er staða flugkvenna í heiminum mjög mismunandi eftir löndum. „Hæsta hlutfall kvenna í flugi er á Indlandi en það þarf ekki að leita lengra en til Bretlands til að finna dæmi þess að kvenflugmönnum sé sagt upp störfum ef þær verða óléttar. Það er því mikið verk óunnið til að gera starfið aðlandi fyrir konur víðast hvar,“ segir Linda.
Aðspurð um ástæður þessa háa hlutfalls hjá Icelandair þá segir Linda að fyrir tæpum áratug hafi konum í flugnámi allt í einu farið að fjölga verulega. „Sennilega vegna þess að þá var komin kynslóð sem leit á atvinnuflug sem raunverulegan valkost fyrir konur vegna þess að þær höfðu fyrirmyndir af öðrum konum í flugi. Konum í umsóknarferli fjölgaði því verulega en bæði kynin fara að sjálfsögðu í gegnum sama umsóknarferli hjá Icelandair. Það hjálpar líka til hvað staða kvenna er sterk hér á landi varðandi barneignarleyfi og vistun barna þar sem vinnutíminn er ekki alltaf fjölskylduvænn. Þetta gerir konum kleift að samræma vinnu og einkalíf.“
Á síðasta ári var Linda beðin um að halda fyrirlestur á ráðstefnu sem haldin var af Alþjóða flugmálastofnuninni og Jafnréttisstofnun Sameinuðu þjóðanna í S-Afríku. Þar fór hún yfir stöðuna hjá Icelandair og ástæður þess að félagið hefur náð eins langt í þessum efnum og raun ber vitni. „Við reynum því að leggja okkar af mörkum til að styrkja stöðu kvenna annars staðar í heiminum því við vitum að blandaðir vinnustaðir eru afar ákjósanlegir fyrir margra hluta sakir eins og fjölmargar rannsóknir hafa sýnt fram á,“ segir Linda að lokum.
