Samfélagsmiðlar

Sala á áramótaflugum til Tenerife gengur best

Kraftmikil innkoma Norwegian á íslenskan sólarmarkað var óvænt og af farmiðaverðinu að dæma þá er mikið um laus sæti í ferðir félagsins til Kanaríeyja. Það á þó ekki við brottfarirnar í lok árs.

Frá sundlaugabakka á Tenerife.

WOW air var stórtækt í flugi til bæði Tenerife og Las Palmas á Kanaríeyjum og þegar hæst stóð bauð félagið upp á allt að þrjár ferðir í viku til fyrrnefndu eyjunnar auk vikulegra brottfara til Las Palmas. Strax í kjölfar gjaldþrots keppinautarins gáfu sjórnendur Icelandair út að félagið myndi fylla þetta skarð en ekki hefur heyrst meira af þeim áformum. Í millitíðinni hefur Norwegian hafið sölu á fimm vikulegum ferðum til Tenerife í vetur og tveimur til Las Palmas.

„Salan á flugleiðinni milli Reykjavíkur [Keflavíkurflugvallar] og Tenerife hefur verið aukast undanfarið, sérstaklega í kringum áramót, og við erum ánægð með það,“ segir Astrid Mannion-Gibson, blaðafulltrúi Norwegian, aðspurð um viðtökurnar við þessu óvenju mikla framboði. Og það er greinilegt af fargjöldunum sem í boði eru á heimasíðu Norwegian að brottfarirnar kringum jól og áramót eru miklu dýrari en aðrar. Á öðrum dagsetningum er verðið oft lágt og hægt að fljúga út til Tenerife og Las Palmas og heim aftur fyrir rétt 40 þúsund krónur á ófáum dagsetningum.

Áður en Norwegian tilkynnti um áform sín um að fljúga svona oft milli Íslands og Kanaríeyja þá höfðu stjórnendur Heimsferða samið við flugfélagið um að ferja farþega ferðaskrifstofunnar vikulega til Tenerife og jafn oft til Las Palmas í vetur. Þessar brottfarir voru lengi vel fráteknar fyrir Heimsferðir en eru nú líka til sölu á heimasíðu Norwegian. Skýringin á því er sú að ferðaskrifstofan hefur fjölgað sætunum til bæði Tenerife og Kanaríeyja og býður upp á tvær ferðir í viku til hvorrar eyju með Norwegian að sögn Tómasar J. Gestsson, forstjóra Heimsferða.

Ferðaskrifstofurnar Úrval-Útsýn og Vita, systurfélag Icelandair, eru einnig umsvifamiklar í sölu á pakkaferðum til Tenerife og Las Palmas og sameinast þær um leiguflug Icelandair til eyjanna. Hjá Úrval-Útsýn stendur farþegum þó líka til boða flug með Norwegian og segir Þórunn Reynisdóttir, forstjóri Úrval-Útsýnar, að ferðum til Tenerife og Las Palmas með Norwegian verði fjölgað ef eftirspurn er fyrir hendi.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …