Fækka ferðum frá Ósló til Íslands

Þotur Norwegian flugfélagsins munu fljúga hingað til lands frá Ósló tvisvar í viku í vetur.

Mynd: Norwegian

Allt frá því að Íslands­flug Norwegian hófst sumarið 2012 þá hafa þotur félagsins flogið til Kefla­vík­ur­flug­vallar frá Ósló þrjár ferðir í viku. Komandi vetr­aráætlun gerir hins vegar aðeins ráð fyrir tveimur brott­förum, á fimmtu­dögum og sunnu­dögum. Túristi hefur óskað eftir skýr­ingum á þessum niður­skurði en ekki fengið. Einnig fást ekki svör við skyndi­legum samdrætti í fram­boði á ferðum félagsins héðan til Spánar í vetur. Engin svör hafa fengist. Auk Norwegian þá bjóða Icelandair og SAS upp á tíðar ferðir milli Íslands og norsku höfuð­borg­ar­innar.

Fjár­hags­staða Norwegian er mjög þröng og biðla stjórn­endur þess nú til eigenda skulda­bréfa um að veita þeim greiðslu­frest á þeim lánum sem eru á gjald­daga í desember nk. Í skiptum fyrir fram­leng­ingu lánanna þá býður Norwegian lánar­drottnum sínum trygg­ingar í lend­ing­ar­leyfum flug­fé­lagsins á Gatwick flug­velli.

Hluta­bréfa­verð í Norwegian rauk upp um 12 prósent í morgun eftir að skandi­nav­íski bankinn SEB gaf út nýja grein­ingu þar sem hluta­bréfa­verð í Norwegian var sagt vanmetið um fjörutíu prósent.