Splunkunýjar Airbus þotur í nokkrum stærðarflokkum bætast við flota skandinvíska flugfélagsins SAS á næstu árum. Og þær verða ekki málaðar á sama hátt og flugvélarnar sem fyrir eru. Bláir liturinn á stélinu mun nefnilega ná yfir mun stærra svæði en áður og hreyflarnir verða ekki lengur rauðir heldur silfurlitaðir. Heiti félagsins verður jafnframt silfrað á búknum. Þetta er meðal þeirra breytinga sem kynntar voru við athöfn í Kaupmannahöfn í morgun. Núverandi útlit á flugflota SAS hefur verið við lýði í tuttugu og eitt ár og því kominn tími á andlitslyftingu að mati stjórnenda félagsins.
Sem fyrr segir er endurnýjun flugflota SAS helsta kveikjan að nýja útlitinu en félagið hefur pantað nýjar Airbus þotur af gerðunum A350, A320neo, A330 og A321LR. Þær verða afhentar í áföngum fram til ársins 2023 og ári síðar er ætlunin að allar eldri þotur verði líka komnar í nýju litina. Í tilkynningu frá SAS segir að málningin sem notuð verður þekji mun betur en sú eldri og þar með þurfi ekki eins margar umferðir sem létti vélarnar töluvert og dragi enn frekar úr eldsneytisþörf.
Á sama hátt ætlar SAS að létta stjórnun fyrirtækisins með því að fækka í framkvæmdastjórn nú um mánaðamótin. Eftir breytingar verða þar sex framkvæmdastjórar auk forstjórans en til samanburðar eru níu í framkvæmdastjórn Icelandair. SAS flutti um 29 milljónir farþega í fyrra en rétt rúmlega fjórar milljónir flugu með Icelandair.