Varasjóður Icelandair í London

Ef stjórnendur Icelandair þurfa á fjármagni að halda til að standa undir taprekstri eða borga inn á nýjar þotur þá gætu þeir komið lendingarleyfum sínum við flugvelli Lundúna í verð. Vísbendingar eru um að virði þeirra fari lækkandi.

Þota kemur inn til lendingar á Heathrow í London. Mynd: Heathrow Airport

Sérfræðingar Icelandair meta tjón flugfélagsins í ár, vegna kyrrsetningar á MAX þotum, á sautján milljarða króna. Ætlunin er að sækja bætur til Boeing vegna þessa en ekki liggur fyrir hversu háa upphæð bandaríski flugvélaframleiðandinn sættist á að greiða eða hvenær uppgjörið fer fram. Því til viðbótar er nærri sjö milljarða króna kaupsamningur malasíska kaupsýslumannsins Vincent Tan, á 75 prósent hlut í hótelkeðju Icelandair Group, háður ýmsum skilyrðum. Af þessum sökum og í ljósi mikils hallareksturs þá hefur spurningarmerki verið sett við lausafjárstöðu Icelandair. Bogi Nils Bogason, forstjóri Icelandair Group, hefur þó sagt þær áhyggjur ástæðulausar.

Það er því ekki útlit fyrir að Icelandair þurfi að selja stórar eignir á næstunni til að standa undir taprekstrinum. En ef löng bið verður eftir bótagreiðslum frá Boeing og hótelsalan fer í uppnám þá situr Icelandair á lendingarleyfum á flugvöllunum Heathrow og Gatwik í London sem koma mætti í verð. Þess háttar leyfi eru ekki verslunarvara annars staðar í Evrópu en þónokkur dæmi eru um að flugrekendur hafi selt leyfi á þessum tveimur flugvöllum fyrir töluverðar upphæðir.

Sérstaklega eru lendingartímar á Heathrow flugvelli, fjölförnustu flughöfn Evrópu, eftirsóttir enda hafa flugbrautirnar þar verið fullbókaðar um langt árabil. Síðustu ár eru dæmi um að leyfi hafi selst fyrir 4 til 8 milljarða króna en Icelandair situr á tveimur leyfum á Heathrow flugvelli en reyndar ekki á komu- og brottfarartímum í morgunsárið en þeir munu vera eftirsóttastir. Engu að síður gæti verðmæti lendingarleyfa Icelandair á Heathrow numið nokkrum milljörðum króna.

Fyrrnefnt plássleysi á Heathrow flugvelli var svo ein af ástæðum þess að Icelandair hóf að fljúga til Gatwick flugvallar, sunnan við bresku höfuðborgina, haustið 2012. Þá fengust lendingarleyfin fyrir lítið eða ekkert en núna eru lausu tímarnir á Gatwick af skornum skammti. Þess vegna gat WOW air selt sína tíma á flugvellinum í lok síðasta árs til að ráða bót á slæmri fjárhagstöðu félagsins. Og nú ætla forsvarsmenn norska flugfélagsins Norwegian að leika sama leik. Á mánudag lögðu þeir nefnilega fram tilboð til eigenda skuldabréfa í félaginu þar sem þeim eru boðin veð í þeim nærri 170 lendingarleyfum sem félagið er með á Gatwick. Samkvæmt mati sem Norwegian hefur látið gera þá er verðmæti allra þessara leyfa um 47 milljarðar króna og hvert og eitt þeirra  því um 270 milljón króna virði. Það er líklega aðeins lægri upphæð en WOW air fékk fyrir sín leyfi á Gatwick enda nokkur munur á því að selja tvö leyfi eða hundrað og sjötíu.

En sem fyrr segir þá liggur aðal verðmætið hjá Icelandair í afgreiðslutímunum á Heathrow. Á það hefur hins vegar verið bent að virði lendingarleyfa í London gæti farið lækkandi vegna Brexit þar sem sú breyting gæti dregið verulega úr vægi borgarinnar sem helsta fjármálamiðstöð Evrópu. Á sama hátt gætu umdeild áform um að leggja þriðju flugbrautina við Heathrow lækkað verðmæti núverandi leyfa.