Flugáætlun Keflavíkurflugvallar stóðst mun betur yfir háannatímann í ár en á sama tíma í fyrra. Þá fór rétt um þriðjungur flugferða í loftið á réttum tíma í júní og um helmingur í júlí. Núna voru hlutföllin mun hærri eins og sjá má á súluritinum hér fyrir neðan. Þessi þróun endurspeglast líka í stundvísitölum Icelandair sem sýna að farþegar þess komast núna oftar á réttum tíma á áfangastað.
Fastlega má gera ráð fyrir að hluti af skýringunni, á þessari bættu stundvísi á Keflavíkurflugvelli, skrifist á minni traffík í kjölfar falls WOW air. Félagið stóð nefnilega undir um þriðjungi áætlunarferða frá Keflavíkurflugvelli sumarið 2018.