Íslenski markaðurinn er veikur um þessar mundir sem skrifast meðal annars á fækkun ferðamanna. Þetta kemur fram í nýbirtu uppgjöri breska Dominos sérleyfishafans sem á 95 prósent í rekstri pizzuframleiðandans á Íslandi. Sölutekjur Dominos hér á landi lækkuðu vegna samdráttarins um eitt prósent í krónum talið en rúmlega 8 prósent þegar litið er framhjá gengisbreytingu frá sama tíma í fyrra.
Stóru fréttirnir í tilkynningu Dominos í Bretlandi í morgun eru þó þær að fyrirtækið ætlar að selja reksturinn á öllum Norðurlöndunum og þar á meðal á Íslandi. Í tilkynningu segir að breski sérleyfishafinn sé einfaldlega ekki heppilegasti eigandinn að útibúum Dominos utan Bretlands.
Dominos í Bretlandi keypti 51 prósent hlut í Dominos á Íslandi haustið 2016 og ári síðar bætti félagið við 44 prósentum. Rekstur íslenska sérleyfishafans náði þá líka til Noregs og Svíþjóðar.