Yrði fyrsta Four Season hótelið á Norð­ur­löndum

Nýr eigandi Geirsgötu 11 á Miðbakkanum við Reykjavíkurhöfn íhugar að opna þar fimm stjörnu hótel. Þess háttar kallar á breytt skipulag og ef af verður þá verða aðeins nokkuð hundruð metrar á milli fimm stjörnu hótela á hafnarbakkanum.

Frá hóteli Four Season í París. Mynd: Four Season

Hin 2.600 fermetra vöru­skemma við Reykja­vík­ur­höfn er til leigu en þó ekki til langs tíma. Nýr eigendi hennar, malasíska fyrir­tækja­sam­steypan Berjaya, hefur nefni­lega uppi áform um að reisa á lóðinni fimm stjörnu hótel undir merkjum Four Season. Þetta kemur fram í frétt RÚV. Berjaya Group festi auk þess nýverið kaup á 75 prósent hlut í Icelandair­hót­el­unum sem reka meðal annars nokkur hótel í miðborg Reykja­víkur.

Þetta malasíska fyrir­tæki, sem leitt er af Vincent Tan, á fjölda hótela í Asíu sem flest eru kennd við móður­fyr­ir­tækið. Auk þess rekur fyrir­tækið tvö Four Season hótel í Japan og útibúið í Reykjavík yrði þá það þriðja sem Tan og Berjaya opna í nafni hótelkeðj­unnar. Þetta yrði jafn­framt fyrsti gisti­staður Four Season á Norð­ur­löndum og einn fárra í norð­ur­hluta Evrópu.

Áður hefur komið fram að deili­skipulag Reykja­vík­ur­borgar gerir ekki ráð fyrir að fleiri hótel opni á þessum stað í höfuð­borg­inni. Nokkuð hundruð metrum frá lóðinni sem um ræðir er verið að reisa Marriott Edition hótel sem verður fyrsta fimm stjörnu hótelið í Reykjavík. Þar verða hátt í þrjú hundruð herbergi.

Nú getur þú tekið þátt í að styrkja og efla útgáfu Túrista