Anda ofan í hálsmálið á Icelandair

Fyrir aðeins nokkrum árum síðan var Icelandair eina norræna flugfélagið í Boston. Nú ætlar SAS sér stóra hluti í borginni með splunkunýjum þotum og Norwegian bætir líka við ferðum til eins af höfuðvígjum íslenska flugfélagsins.

Frá Boston. Mynd: Lance Anderson / Unsplash

Það liggur fyrir að San Francisco og Kansas City detta út af sumaráætlun Icelandair á næsta ári. Þar með hefur áfangastöðum flugfélagsins í Bandaríkjunum fækkað um sex frá því í fyrrasumar. Á sama tíma horfa stjórnendur hinna norrænu flugfélaganna í auknum mæli vestur um haf.

Nýjasta dæmið um það er boðuð sókn SAS í flugi milli Kaupmannahafnar og Boston í tengslum við nýjustu viðbótina í flugflota félagsins. Um er að ræða fyrstu Airbus A321LR þotu SAS en þar er á ferðinni nýjar og óvenju langdrægar tveggja raða farþegaþotur. Tilkoma þeirra gerir það að verkum að SAS styðst ekki lengur aðeins við breiðþotur í flugi sínu yfir Atlantshafið.

Það er athyglisvert að SAS kjósi að nýta nýju þotuna í flug milli Kaupmannahafnar og Boston vegna sterkrar stöðu Icelandair í borgunum tveimur. Bostong og Kaupmannahöfn hafa nefnilega lengi verið tvö af höfuðvígjum Icelandair og stóðu samtals undir þrettán prósent af heildarfarþegafjölda félagsins í fyrra samkvæmt opinberum tölum sem Túristi hefur aflað sér. Í ljósi þess að hlutfall tengifarþega er hátt hjá Icelandair þá eru vafalítið margir farþega Icelandair einmitt á ferðinni milli Boston og Kaupmannahafnar með millilendingu á Keflavíkurflugvelli.

Nú ætlar að SAS sér stærri sneið af þeirri köku með því að starfrækja flugleiðina allt árið um kring í stað þess að einskorða ferðirnar til Boston við sumaráætlunina. Reynsla SAS af flugi til Boston er reyndar ekki löng því það var fyrst sumarið 2016 sem félagið fór jómfrúarferð sína þangað. Haustið áður hafði félagið tilkynnt um þessa nýju landvinninga og þá vakti athygli að í sömu fréttatilkynningu kom fram flug milli Kaupmannahafnar og Reykjavíkur yrði ein af nýjum næsta árs.

Segja má að þarna hafi SAS veitt Icelandair tvöfalt kjaftshögg og olli þessi sókn SAS töluverðum óróa innan raða Icelandair samkvæmt heimildum Túrista. Var þetta af sumum túlkað sem svar SAS við þeirri ákvörðun Icelandair að hefja flug til Chicago. Þar í borg hafði SAS fyrir löngu komið sér vel fyrir á sama hátt og Icelandair hafði um árabil verið eina norræna flugfélagið í Boston.

Í viðtali Túrista við einn af stjórnendum SAS kom hins vegar fram að það hafi verið algjör tilviljun að tilkynnt var samdægurs um flug til bæði Boston og Reykjavíkur.

En það er ekki aðeins SAS sem sér tækifæri í Boston. Þangað ætlar Norwegian líka að stefna fleiri flugvélum en þó ekki frá Skandinavíu heldur frá London, París og Róm. Icelandair hefur lengi verið umsvifamikið í flugi til þeirra tveggja fyrrnefndu en hefur ekki ennþá hafi flug til ítölsku höfuðborgarinnar.

Norska flugfélagið hyggst líka fjölga ferðunum sínum til Denver og Chicago sem báðar eru heilsársáfangastaðir hjá Icelandair. Í fyrra flaug Icelandair 122 þúsund farþegum til Chicago en 97 þúsund farþegum til Denver. Samtals er það um 16 prósent af heildarfarþegafjöldanum í Bandaríkjaflugi Icelandair á síðasta ári.

Það vekur jafnframt athygli að bæði Norwegian og SAS sjá nú tækifæri í auknum flugsamgöngum til San Francisco en Icelandair er einmitt á leiðinni af þeim markaði sem fyrr segir.

Uppfært: Í upphaflegri útgáfu fréttarinnar sagði að Airbus A321LR þoturnar hafi verið á teikniborðinu þegar Icelandair stóð í viðræðum við Airbus og Boeing um kaup á flugvélum árið 2012. A321LR þoturnar voru hins vegar fyrst markaðssettar tveimur árum síðar. 

Nú getur þú tekið þátt í að styrkja og efla útgáfu Túrista