Helmingi færri ferðamenn en reiknað var með

Þær tölur sem Morgunblaðið birti í dag af mögulegum umsvifum Play ganga ekki upp. Ekki var þó ætlunin að villa um fyrir fólki.

Tölvuteikning frá Play

Áform flugfélagsins Play gera ráð fyrir að farþegar þess verði samtals 4,3 milljónir á næstu þremur árum. Frá þessu er sagt í Morgunblaðinu í dag undir fyrirsögninni Hundraða milljarða hagsmunir undir. Þar kemur jafnframt fram að á þessu þriggja ára tímabili ætti Play að flytja um 1,7 milljónir ferðamanna til Íslands.

Þessar tvær stærðir ganga þó ekki upp í þessu samhengi nema þrír af hverjum fjórum farþegum Play verði erlendir ferðamenn. Ástæðan er sú að flugfarþegar eru ávallt taldir á hverjum fluglegg, bæði þegar þeir fljúga til og frá landinu. Ferðamaðurinn er aftur á móti aðeins talinn einu sinni við landamærin.

Af þeim sökum beindi Túristi þeirri spurningu til Boga Guðmundssonar, eins af framkvæmdastjórum Play og viðmælanda Morgunblaðsins í dag, hvort ekki væri réttara að tala um að Play gæti flutt 850 þúsund ferðamenn til landsins en ekki 1,7 milljónir. Í svari sínu segir Bogi að það sé rétt athugað og ferðamannafjöldinn hjá Play verði þá nær 900 þúsundum. Bogi bætir því við að ekki hafi verið ætlunin að villa um fyrir fólki.

Líkt og áður hefur komið fram þá efndi Play til fjárfestafundar með forsvarsfólki íslenskra ferðaþjónustufyrirtækja í gær. Í fundarboði var bent á að áætlanir flugfélagsins gerðu ráð fyrir að félagið myndi ferja 1,7 milljónir ferðamanna til Íslands á næstu þremur árum. Nú liggur hins vegar fyrir að ferðamennirnir verða um helmingi færri.

Á það ber líka að líta að Play ætlar að hefja flug á flugleiðum sem nú þegar eru í boði í flugi til og frá Keflavíkurflugvelli. Félagið mun því væntanlega ekki verða hrein viðbót við það sem fyrir er á markaðnum heldur taka hluta af þeim farþegum sem annars hefðu valið Icelandair, Delta, SAS, Norwegian eða Transavia.

Nú getur þú tekið þátt í að styrkja og efla útgáfu Túrista