Frá því haustlok hefur tékkneska flugfélagið Czech Airlines boðið upp á heldur óvenjulegt áætlunarflug til Íslands. Þoturnar fljúga nefnilega Prag til Kaupmannahafar og þaðan áfram til Íslands. Lent er á Keflavíkurflugvelli seint um kvöld og brottför þaðan til Kaupmannahafnar klukkan hálf fimm morguninn eftir. Farþegar geta því valið hvort þeir fljúga aðeins til Kaupmannahafnar eða haldi alla leið til Prag.
Þessar ferðir hafa verið í boði daglega og fargjöldin nokkru lægri en til að mynda í flugi Icelandair og SAS til Kaupmannahafnar. Nú sér hins vegar fyrir endann á þessum flugferðum því stjórnendur tékkneska félagsins hafa fellt niður allar ferðir frá 7. janúar næstkomandi. Þetta staðfestir talskona félagsins í svari til Túrista. Hún bendir á að Czech Airlines muni byrja að fljúga til Íslands á ný í lok mars og þá beint frá Prag án millilendingar í Kaupmannahöfn.
Dagskrá Keflavíkurflugvallar á fyrsta fjórðungi næsta árs gerði ráð fyrir áframhaldandi daglegu flugi tékkneska flugfélagsins og hefði félagið þá staðið undir um 2 prósentum af öllu áætlunarflugi héðan þessa fyrstu þrjá mánuði ársins. Niðurfelling á öllum þessum ferðum hefur því þónokkur áhrif og því útlit fyrir að fjöldi áætlunarferða á þessu tímabili verði um 23 prósent lægri en á sama tíma í ár. Það er meira en fram kom í nýrri úttekt Túrista yfir flugumferð til og frá landinu byrjun næsta árs.
Sú samantekt hefur verið uppfærð en ítarlegri greining á því hvernig flugframboð breytist milli landa og áfangastaða verður send síðar í dag til þeirra sem styrkja útgáfu Túrista með mánaðarlegum framlögum.
Farþegar sem áttu bókaða miða í ferðir Czech Airlines til Prag eða Kaupmannahafnar munu fá tilkynningu frá flugfélaginu og miðar þeirra endurgreiddir.
