Flugrekstur hins nýja WOW air mun hefjast á komandi vikum og ætlunin er að flugfélagið tengi saman lönd og heimsálfur. Þetta er meðal þess sem kemur fram í færslu á Linkedin síðu Michele Roosevelt Edwards, forsvarskonu endurreisnar WOW air. Hún heitir jafnframt viðskiptavinum flugfélagsins öryggi, þægindum og sanngjörnum fargjöldum þegar þar að kemur.
Ekkert kemur fram þar um hvert flugfélagið ætlar að fljúga eða hvenær miðasala hefst. Gunnar Steinn Pálsson, talsmaður WOW air, segist í samtali við Túrista ekki vilja tjá sig um einstaka þætti í undirbúningsferlinu.
Hann ítrekar það sem áður hefur komið fram að í upphafi verði megináherlsa á fraktflutninga á meðan verið er að prufukeyra reksturinn en frá fyrsta degi verða jafnframt farþegar um borð. Áður hefur komið fram að fyrsta flugleiðin verði milli Keflavíkurflugvallar og Dulles flugvallar í Washington borg.
WOW air er þó ekki eina flugfélagið sem stefnir á hefja áætlunarflug héðan í ár því ennþá mun vera unnið að því stofnun Play flugfélagsins. Aðspurður um hvort til greina komi að flugfélögin tvö hafi með sér samstarf eða sameinist þá segir Gunnar Steinn að þær hugmyndir hafi ekki skotið upp kollinum. „Ennþá síður hafa einhver samskipti verið milli Play og okkar.“