Keflavíkurflugvöllur heldur fimmta sætinu en gæti misst það í ár

Þrátt fyrir að farþegum hafi fækkað töluvert í fyrra þá er Flugstöð Leifs Eiríkssonar ennþá sú fimmta fjölfarnasta á Norðurlöndum.

Um fjórðungi færri áttu leið um Keflavíkurflugvöll í fyrra samanborið við árið á undan. Mynd: Isavia

Síðustu ár hefur Keflavíkurflugvöllur flogið upp listann yfir þær norrænu flughafnir sem flestir farþega fara um. Árið 2014 komst íslenski flugvöllurinn til að mynda upp fyrir Brommaflugvöll í Stokkhólmi og Billund á Jótlandi. Síðan skutust norsku flugvellirnir í Þrándheimi og Stavanger aftur fyrir Keflavíkurflugvöll sem einnig tók fram úr Bergen í Noregi og Gautaborg í Svíþjóð og komst þannig í fimmta sætið á topplistanum.

Og þar situr Keflavíkurflugvöllur áfram þrátt fyrir að farþegum þar hafi fækkað um fjórðung í fyrra og farið niður í rúmar 7,2 milljónir. Í ár gerir Isavia farþegaspá Isavia ráð fyrir að farþegafjöldinn fari niður í 6,7 milljónir og þá er stutt í sjötta og jafnvel sjöunda sætið eins og sjá má á listanum yfir 10 fjölförnustu flughafnir Norðurlanda.

Þess má geta að Keflavíkurflugvöllur er sá eini á listanum sem gerir aðeins út á millilandaflug. Innanlandsflug er nefnilega umtalsverður hluti af starfseminni á öllum hinum flugvöllunum.