Kínverska flug­fé­lagið flýgur alla leið til Kefla­vík­ur­flug­vallar

Dreamliner þotur Juneyao Air munu fljúga til Íslands frá Sjanghæ frá og með vorinu en þó með viðkomu í Helsinki.

Juneyao Air mun nota Dreamliner þotur í flug sitt til Íslands Mynd: Star Alliance

Kín­verska flug­fé­lagið Ju­neyao Air hef­ur boðað flug til Íslands frá Sj­ang­hæ með viðkomu í Hels­inki frá og með byrjun mars­mán­aðar. Morg­un­blaðið sagði hins vegar frá því í fyrradag að kínverska félagið hygðist ekki sjálft sinna flug­inu milli Finn­lands og Íslands held­ur leita til annarra flug­fé­laga þar á meðal Icelanda­ir.

Þetta er þó ekki rétt samkvæmt svari Zicheng Wang, tals­manns Ju­neyao Air, við fyrir­spurn Túrista. „Við munum styðjast við eigin flug­vélar og starfs­fólk í fluginu milli Hels­inki og Reykja­víkur og farþegar geta keypt miða frá Sjanghæ til Reykja­víkur með Juneyao Air. Að sjálf­sögðu með milli­lend­ingu í Hels­inki,” segir í svari Wang.

Icelandair er ekki eina flug­fé­lagið sem flýgur allt árið um kring frá Hels­inki til Íslands því það gerir Finnair einnig. Og í svari Ju­neyao Air segir að félagið eigi í samstarfi við Finnair og farþegar geti því keypt farmiða þar sem finnska flug­fé­lagið sér um flugið á leið­inni milli Finn­lands og Íslands en kínverska félagið milli Kína og Finn­lands. „Einnig er til skoð­unar mögu­leikinn á samstarfi við Icelandair. Við bíðum ákvörð­unar um það frá höfuð­stöðvum okkar”.

Auk þess að nýta eigin flug­vélar í flugið til Íslands þá verður starfs­maður á vegum Juneyao Air stað­settur hér á landi frá og með byrjun mars þegar Íslands­flug kínverska flug­fé­lagsins hefst.

VILTU STYÐJA VIÐ ÚTGÁFU TÚRISTA?