„Í dag eru fimm MAX flughermar í Evrópu og Icelandair er eina flugfélagið í álfunni sem á sinn eiginn. Til viðbótar rekur Boeing sjálft fjóra MAX herma í Evrópu, í Bretlandi og Tyrklandi. Í Bandaríkjunum eru til um tíu slíkir,“ segir Guðmundar Örn Gunnarsson, framkvæmdastjóri TRU Flight Training Iceland, sem rekur flugherma Icelandair í Hafnarfirði. En líkt og Túristi greindi frá í dag er útlit fyrir að þeir tiltölulega fáu MAX hermar, sem starfræktir eru í dag, verði þéttsetnir á næstu misserum.
Megin skýringin á því er sú að nú gerir Boeing kröfu um að allir þeir flugmenn sem fljúga eiga Boeing MAX þotum fari í sérstaka þjálfun í flughermi áður en þeir taka á loft á nýjan leik. Þessi stefnubreyting var kynnt af forstjóra Boeing í fyrradag en áður höfðu stjórnendur flugvélaframleiðandans gefið út að tölvunámskeið ætti að duga þegar kyrrsetningu þotanna lýkur. Ekki liggur þó fyrir hvenær það verður.
Aðspurður segir Guðmundur Örn að í kjölfar yfirlýsingar forstjóra Boeing hafi borist fyrirspurnir frá flugfélögum en áður hafi fleiri erlend félög sett sig í samband. „Sum þeirra hafa nú þegar gengið frá samningum og þjálfun er að hefjast á næstunni og þá aðallega hjá flugvirkjum sem vinna munu við MAX þoturnar. Þegar Boeing hefur uppfært hugbúnað MAX þotanna og flugmálayfirvöld samþykkt þær breytingar þá má búast við að flughermirinn verði í notkun allan sólarhringinn fyrir flugmenn Icelandair og erlendra flugfélaga,” segir Guðmundur Örn. Hann bætir því við að Icelandair hafi tryggt sér þá tíma sem flugmenn félagsins þurfa á að halda.
Og eftirspurnin eftir þjálfun flugmanna í MAX flughermum er greinilega mikil því samkvæmt frétt Financial Times þá eiga bandarísk flugfélög í vandræðum með að fá þá tíma sem þau þurfa.
