Samfélagsmiðlar

Sitja á lendingarleyfum á Keflavíkurflugvelli sem verða ólíklega notuð

Fyrir nokkrum árum síðan úrskurðaði Samkeppniseftirlitið að Icelandair skildi láta WOW air fá hluta af lendingarleyfum sínum. Nú stefnir í að Icelandair muni ekki einu sinni nota öll þau leyfi sem félagið er með á þessum tímum sem áður stóð styr um.

Þrátt fyrir að Icelandair hafi í fyrra gefið frá sér allt flug til bandarísku borganna Kansas City og Cleveland og Halifax í Kanada þá er félagið ennþá með frátekna afgreiðslutíma á Keflavíkurflugvelli fyrir ferðir til þessara borga. Til viðbótar hefur Icelandair fengið úthlutaða lendingar- og brottfarartíma, svokölluð slott, fyrir fjölda flugferða í viku hverri sem telja má víst að aldrei verði farnar. Þetta leiðir samanburður Túrista í ljós á annars vegar sumaráætlun Icelandair og hins vegar sumaráætlun Isavia.

Flest slottin liggja utan háannatíma flugvallarins, þ.e. um miðjan morgun eða um kaffileytið. Þarna eru þó líka að finna brottfarir á tímum sem WOW air sóttist eftir fyrir sex árum síðan. Í framhaldinu úrskurðaði Samkeppniseftirlitið að Icelandair skyldi láta keppinautinn fá tvo afgreiðslutíma að morgni og tvo seinnipartinn.

Hæstiréttur felldi svo þann úrskurð úr gildi og tók þar með undir málatilbúnað Icelandair og Isavia sem vísuðu til alþjóðlegra reglna sem kveða á um hefðarétt flugfélaga á afgreiðslutímum.

Sá réttur fellur þó úr gildi ef slottin eru ekki nýtt í átta af hverjum tíu tilvikum. En sem fyrr segir þá gerir núverandi sumaráætlun Icelandair ekki ráð fyrir nándar nærri eins mörgum flugferðum og félagið hefur fengið tíma fyrir á Keflavíkurflugvelli.

Aðspurð um öll þau slott sem stefnir í að verða ekki nýtt í sumar þá segir Ásdís Ýr Pétursdóttir, upplýsingafulltrúi Icelandair, að félagið muni nota alla úthlutaða brottfarar- og komutíma á háannatíma. Segir hún að þar sé fyrst og fremst horft til brottfara þegar flestar ferðir eru á dagskrá, frá rúmlega sjö til átta á morgnana.

Sem dæmi um misræmið sem ríkir núna á milli sumaráætlunar Keflavíkurflugvallar og Icelandair þá má nefna að flugfélagið er með leyfi fyrir 75 áætlunarferðum héðan föstudaginn 26. júní. Flugáætlun Icelandair geri þó aðeins ráð fyrir 57 ferðum þennan dag. Af þessum átján slottum sem út af standa eru fimm á háannatíma seinnipartinn og eitt korter í átta að morgni.

Allt eru þetta tímasetningar sem WOW air sóttist eftir því að fá á sínum tíma. Ásdís vill þó ekki meina að Icelandair sé í raun að takmarka aðgengi annarra að Keflavíkurflugvelli með því að sitja á afgreiðslutímum sem ekki eru lengur inn á áætlun félagsins. Máli sínu til stuðnings bendir Ásdís Ýr á að töluvert sé af lausum afgreiðslutímum á flugvellinum.

Og eftir fall WOW air er ljóst að það er nægt pláss á flugbrautunum við Leifsstöð stóran hluta dagsins en þó ekki á þessum vinsælustu tímum að morgni og seinnipartinn. Þar eru þó nokkur slott sem Icelandair mun ólíklega nota sem fyrr segir. Í því ljósi gæti sú staða komið upp að forsvarsfólk endurreisnar WOW air eða Play gætti sótt um þessa sömu tíma. Þá yrði Icelandair annað hvort að bæta við flugferðum til að nýta slottin eða gefa þau eftir til nýrra keppinauta. Um leið gæti Icelandair séð á eftir afgreiðslutímunum til langrar framtíðar í ljósi hefðaréttarins sem gildir um afnotin.

Þess ber þó að geta að aðeins þeir sem eru með flugrekstrarleyfi geta sótt um slott á flugvöllum. Ennþá er Play ekki komið með slíkt leyfi og forsvarsfólk WOW hefur ekkert viljað gefa neinar upplýsingar um þess háttar formsatriði.

 

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …