„Salan niður um níutíu prósent sem þýðir í raun algjört stopp. Skiptir engu hvort um er að ræða sólarlandaferðir, borgarferðir eða viðskiptaferðir. Það hafa komið inn færri bókanir síðustu tíu daga en fyrstu tíu dagana eftir Guð blessi Ísland ávarpið hans Geir H. Haarde. Það er algjört frost og engu líkara en það sé búið að skipa fólki að halda sig inni. Ég hef aldrei séð sölustopp og tíðar afbókanir eiga sér stað á sama tíma,” segir Þórunn Reynisdóttir, forstjóri Úrval-Útsýn.
Af samtölum hennar við erlend ferðaþjónustufyrirtæki er staðan slæm víða. „Ég tala við marga af okkar birgjum út í heimi. Þeir hafa heldur ekki upplifað þetta ástand. Staðan er því mjög alvarleg og alls ekki bara bundin við Ísland. Hjá okkur gerðist þetta kannski aðeins fyrr því við eru lítil þjóð en núna hefur ástandið úti versnað hratt síðustu daga.”
Þórunn bendir á að ferðaskrifstofur sem selja ferðir út í heim séu mikilvægur hluti af ferðaþjónustunni. „Við kaupum hluta af þeim sætum sem eru í boði hjá flugfélögum sem fljúga til og frá landinu sem gerir þeim kleift að halda úti tíðari ferðum. Þannig sér Icelandair um leiguflugið á okkar áfangastaði í sumar.”
Aðspurð um næstu skref og mögulegan niðurskurð þá segir Þórunn að ferðaþjónustan byggist á mannauði. „Ef fyrirtækin fara að segja upp fólki þá dettur út þekking og það mun taka langan tíma að þjálfa upp fagfólk á ný. Það skiptir því öllu máli að komast hjá umfangsmiklum hópuppsögnum. Við trúum því að þetta sé tímabundið ástand og því yrði það slæmt fyrir þjóðfélagið ef fyrirtækin þyrftu að segja upp fólki,” segir Þórunn Reynisdóttir, forstjóri Úrval-Útsýn.
Hún segist taka undir með Ásbergi Jónssyni, framkvæmdastjóra Nordic Visitor, sem segir það einna mikilvægast núna að Vinnumálastofnun fá heimild til að aðstoða fyrirtæki við að lækka starfshlutfall starfsfólks og þannig komast hjá uppsögnum.
„Það er ekki eftir neinu að bíða, drífið í þessu,” segir Þórunn og beinir orðum sínum að ráðamönnum. „Markaðssetning á landinu má bíða. Það er verkefni til lengri tíma. Nú þarf að grípa til aðgerða sem koma okkur til hjálpar einn, tveir og þrír.”
Hjá Úrval-Útsýn er nú horft til þess að fækka ferðum í apríl og maí. Þórunn telur jafnframt að draga þurfi meira saman ef ástandið batnar ekki. „Núna er bókunartímabilið fyrir sumarið og ef þetta heldur áfram þá verður að fækka ferðum á þeim tíma. Reynslan hefur kennt mér að sala á flugi til landsins endurspeglast í sölu á utanlandsferðum. Staðan er því mjög slæm á öllum stöðum.”