Útbreiðsla kórónaveirunnar hefur lamað flugsamgöngur út um allan heim og flugáætlun Icelandair hefur dregist saman um meira en níutíu prósent. Tekjurnar eru því sáralitlar og þó ríkið hafi tekið yfir stóran hluta af launagreiðslum þá má gera ráð fyrir að félagið tapi á bilinu 100 til 200 milljónum króna á hverjum degi þessar vikurnar. Og í dag er mjög óljóst hvenær flugsamgöngur hefjist með almennum hætti á ný.
Það hefur því legið fyrir að Icelandair, eins og mörg önnur flugfélög, þyrfti á auknu fjármagni að halda. Í tilkynningu sem félagið sendi frá sér í þarsíðustu viku sagði að unnið væri með þremur bönkum og stjórnvöldum að því að styrkja fjárhagsstöðuna. Nú í morgun kom svo ný tilkynning þar sem segir að Icelandair samsteypan vinni að því að styrkja bæði lausafjár- og eiginfjárstöðuna og ætlunin að hefja hlutafjárútboð á næstunni.
Ekki kemur fram í tilkynningunni hversu stórt hið mögulega hlutafjárútboð verður en samkvæmt svari frá Icelandair þá liggur hvorki tímarammi né stærð útboðsins fyrir á þessu stigi.
Þar með er áfram óljóst hversu mikið núverandi hlutafé minnkar. Í því samhengi má rifja upp að nú er rúmt ár liðið frá síðustu hlutafjáraukningu í Icelandair en þá keypti bandaríski fjárfestingasjóðurinn PAR Capital Management alla viðbótina, um 11,5 prósent hlut, fyrir 5,6 milljarða króna.
Í tilkynningunni sem send var út í morgun segir að í þessu ferli sem nú er í gangi sé Icelandair í góðu sambandi við stjórnvöld. Af því orðalagi að dæma þá er ennþá ekki unnið að því að hið opinbera styrki félagið fjárhagslega en sú leið hefur verið farin í mörgum löndum eftir að kórónuveirukrísan braust út.
Í vikunni gerðu þannig nokkur af stærstu flugfélög Bandaríkjanna samkomulag við hið opinbera um fjárhagsaðstoð sem felur meðal annars í sér að bandaríska ríkið fær allt að þriggja prósent hlut í félögunum sem veð fyrir lánum. Ríkisstjórnir allra hinna Norðurlandanna ætla að styðja við flugrekstur í sínum löndum með lánaábyrgðum og easyJet, stærsta lággjaldafugfélag Bretlands, hefur fengið vilyrði fyrir lánum frá breskum stjórnvöldum.
Á sama tíma eru viðræður í gangi um aðkoma þýskra stjórnvalda að Lufthansa samsteypunnar og Frakkar og Hollendingar ætla að styðja við AirFrance og KLM. Finnska ríkið ætlar að ábyrgjast lán upp á um 95 milljarða til Finnair en finnska ríkið fer reyndar með 56 prósent hlut í félaginu. Hið opinbera á einnig stóra hluti í SAS, AirFrance og KLM.
– Fréttin var uppfærð eftir að svar barst frá Icelandair um tímasetningu og stærð útboðsins.
Viltu styðja Túrista?
Nú þegar virkilega á reynir þá stendur Túristi vaktina frá morgni til kvölds. Ef þú ert einn þeirra lesenda sem finnst gagn í skrifum Túrista þá væri ómetanlegt ef þú myndir leggja útgáfunni lið. Smelltu hér fyrir nánari upplýsingar.
