Play komið með nægt fjár­magn til að hefja flug

Ef staðan væri önnur í heimsmálunum þá gæti Play hafið áætlunarflug nú þegar. Ljóst er að óvissa í fluggeiranum hefur ekki bara dregið úr samkeppni heldur líka fjölgað framboði á leiguflugvélum frá því sem var þegar Play var fyrst kynnt til sögunnar.

Tölvuteikning: Play

Það var í byrjun nóvember í fyrra sem forsvars­menn Play kynntu áform sín um stofnun nýs íslensks lággjalda­flug­fé­lags. Þá var ætlunin að hefja flugrekstur strax í byrjun þessa árs en þau áform gengu ekki eftir og ljóst má vera að aðstand­endur verk­efn­isins prísa sig sæla fyrir það í dag. Heims­far­ald­urinn sem nú gengur yfir hefur nefni­lega lamað allar flug­sam­göngur og stjórn­endur flug­fé­laga róa nú lífróður.

Samkvæmt áreið­an­legum heim­ildum Túrista býður Play nú átekta með að taka fyrstu flug­vélina í notkun en ef samgöngur væru með eðli­legum hætti þá gæti félagið tekið til starfa nú þegar. Play hefur samkvæmt sömu heim­ildum svigrúm til að skala sig upp hratt því aðstæður á flug­markaði í dag eru þannig að félagið getur fengið nokkurn fjölda nýlegra Airbus A320 Neo með tiltölu­lega litlum fyrir­vara. Innan­búð­ar­maður lýkir núver­andi stöðu við að standa á rásmarkinu í lang­hlaupi, búinn að æfa, tilbúinn til keppni en rásbyssan standi á sér. Play verði því tilbúið í að styðja við uppbygg­ingu ferða­þjón­ust­unnar þegar að því kemur eins og viðkom­andi kemst að orði.

Upphaf­lega áform PLAY gerðu ráð fyrir að félagið myndi hefja flug til sex evrópskra áfanga­staða, þar á meðal Alicante og Tenerife. Norwegian, sem hefur verið mjög umsvifa­mikið í Íslands­flugi frá þessum tveimur spænsku borgum, mun ekki halda ferð­unum áfram næstu mánuði miðað við nýja viðskipta­áætlun. Þar með minnkar framboð á flugi til þessara staða en auðvitað er ennþá ekkert hægt að segja til um hvenær hægt verður að fljúga á ný milli Íslands og Spánar eða til annarra landa.

Þess má geta að Mannlíf fjallaði um stöðu Icelandair og Play í frétt í morgun.