Bróðurpartur Bandaríkjamanna ætlar að bíða með utanlandsferðir

Þó margir vestanhafs séu farnir að huga að ferðalögum í sumar þá gefa niðurstöður nýrrar könnunar sterklega til greina að margir ætli sér að halda sig innanlands.

Frá Manhattan í New York. Mynd: Hecton Arguello / Unsplash

Rétt um helmingur íbúa Bandaríkjanna telur orðið óhætt að fara í lengri ferðalög í eigin bíl. Fjórðungur fólks ætlar þó að halda kyrru fyrir heima hjá sér þangað til að hættan á því að smitast af Covid-19 er yfirstaðin. Þetta er meðal þess sem kemur fram í nýjustu niðurstöðum vikulegrar könnunar Destination Analysts sem byggir á um tólf hundrað svörum.

Stór hluti áætlunarflugs frá Bandaríkjunum til Íslands er frá flugvöllum í norðausturhluta Bandaríkjanna, t.d. New York og Boston, og á þessu svæði segjast áttatíu prósent svarenda ætla að forðast ferðalög út í heim á næstunni. Ungt fólk er þó líklegra en þeir eldri til að halda út í heim.

Þrátt fyrir allt eru margir vestanhafs farnir að hugsa sér til hreyfings og skipuleggja einhvers konar ferðalög á næstu misserum. Þannig segjast 64 prósent þátttakenda í könnuninni vera með eina eða fleiri reisur á prjónunum. Bróðurparturinn (84%) snýr þó að ferðalögum innan Bandaríkjanna.

Þriðjungur ferðamanna hér á landi í fyrra kom frá Bandaríkjunum en síðastliðið sumar flugu þrjú stærstu flugfélögin þar í landi daglega til Keflavíkurflugvallar. Þau hafa öll fellt niður allar brottfarir nú í sumar.

Icelandair hefur á sama tíma hætt sölu á farmiðum til tveggja bandarískra borga líkt og Túristi greindi frá í gær.