Greiðslu­stöðv­unin hefur engin áhrif Hertz á Íslandi

Stjórnendur bílaleigunnar Hertz hafa óskað eftir greiðslustöðvun í Norður-Ameríku. Rekstur undir heiti Hertz heldur þó áfram með óbreyttu sniði víðast hvar annars staðar í heiminum.

Hertz á erfitt uppdráttar vestanhafs vegna stöðunnar sem nú er uppi vegna Covid-19. Mynd: Hertz

Bíla­leigu­fyr­ir­tækið Hertz sótti um greiðslu­stöðvun í Banda­ríkj­unum og Kanada í lok síðustu viku. Mikill samdráttur í tekjum, sem rekja má til Covid-19, er helsta ástæða þess að svona er komið fyrir einni stærstu bíla­leigu Norður-Ameríku samkvæmt tilkynn­ingu sem fyrir­tækið birti á föstudag.

Þessi staða Hertz í heima­landinu hefur engin áhrif á rekstur Hertz á Íslandi að sögn Kristjáns Berg­mann Sigur­björns­sonar, fram­kvæmda­stjóra sölu- og mark­aðs­sviðs fyrir­tæk­isins. Hann segir fyrir­tækin tvö ekki fjár­hag­lega tengd þar sem Hertz hér á landi er aðeins leyf­is­hafi vörumerk­isins.

„Í raun er allt óbreytt hjá okkur og félagið er og hefur verið í góðum rekstri,” segir Kristján Berg­mann. Hann tekur þó fram að staðan í ferða­þjón­ust­unni sé vissu­lega þröng nú um stundir vegna heims­far­ald­ursins.