Með þriggja til fjögurra mínútna millibili er skipt um allt loft í farþegarýmum flugvéla easyJet. Og síurnar í loftræstikerfi þotanna eru af sömu tegund og þær sem notaðar eru á sjúkrahúsum. Þetta er meðal þess sem kemur fram í nýju myndbandi frá easyJet.
Þar sést líka hvernig flugvélar þessa breska lággjaldaflugfélags verða þrifnar á milli ferða og óhætt er að segja að ekki á að spara sprittið.
easyJet hefur verið stórtækt í flugi milli Íslands og Bretlands síðustu átta ár. Keflavíkurflugvöllur er þó ekki enn þeirra flugvalla sem easyJet hefur flug til um miðjan júní þegar starfsemi félagsins hefst á ný eftir Covid-19 heimsfaraldurinn.