Bæta við brott­förum til Evrópu en fella niður flug til Banda­ríkj­anna

Óvissa ríkir um hvort Bandaríkjamönnum verði heimilað að fljúga til Evrópu í næsta mánuði og þar með tekur flugáætlun Icelandair breytingum.

hamborg elbphilharmonie thies raetzke 0009
Hamborg, næst fjölmennsta borg Þýskalands, bætist nú við sumaráætlun Icelandair. Mynd: Ferðamálaráð Hamborgar

Sú flugáætlun sem Icelandair birti um miðjan þennan mánuð gerði ráð fyrir áætl­un­ar­ferðum til sjö banda­rískra borga í næsta mánuði. Nú liggur aftur á móti fyrir að ekki verður af þessu vegna þeirrar óvissu sem ríkir um opnun ytri landa­mæra Evrópu­sam­bandsins og Schengen-svæð­isins.

Samkvæmt upplýs­ingum frá Icelandair er nú aðeins gert ráð fyrir áfram­hald­andi flugi til Boston tvisvar í viku og svo verður einni ferð í viku til Seattle bætt við áætl­unina. Seinni hlutann í júlí er svo áformað að fljúga einnig til JFK flug­vallar í New York og Toronto í Kanada.

Á sama tíma og flugið vestur um haf verður skorið niður þá bætast við ferðir til Evrópu. Þannig verður tíðni brott­fara til núver­andi áfanga­staða í álfunni aukinn í sumum tilfellum og svo hefst á flug á ný til Brussel og Hamborg. Einnig verður ferð­unum til Billund í Danmörku fjölgað og flugið þangað starf­rækt yfir lengri tíma en ráðgert var.