Ekki lengur stærsti hluthafinn í Icelandair

Bandaríski vogunarsjóðurinn PAR Capital Management heldur áfram að selja bréf sín í íslensku fyrirtækjasamsteypunni.

Mynd: Berlin Airport

Bandaríski vogunarsjóðurinn PAR Capital hefur síðustu vikur losað sig við hlutabréf í Icelandair Group í smáskrefum. Þrátt fyrir það hefur sjóðurinn áfram verið efstur á blaði yfir tuttugu stærstu hluthafa í þessu stærsta ferðaþjónustufyrirtæki landsins.

Núna er aftur á móti svo komið að Lífeyrissjóður verzlunarmanna er orðinn stærsti hluthafinn samkvæmt nýbirtum hluthafalista á heimasíðu Icelandair Group. Hlutur lífeyrissjóðsins nemur sem fyrr 11,81 prósenti en PAR Capital er komið niður í 11,75 prósent.

Þrír mismunandi sjóðir á vegum Stefnis eiga þó ennþá meira eða 12,25 prósent samanlagt.

Áður en bandarísku fjárfestarnir hófu að selja bréf í Icelandir um páskana þá áttu þeir 13,7 prósent. Síðan þá hafa þeir í heildina selt rétt rúmlega 106 milljón hluti í Icelandair og hefur gengið á þessu tímabili rokkað á milli 1,5 og 3,4.

Í dag er gengið um 2,3 en stærstan hluta bréfa sinna í Icelandair Group keypti PAR Capital á genginu 9,03 í fyrra fyrir um 5,6 milljarða króna. Síðasta sumar bætti sjóðurinn svo við fleiri bréfum á ennþá hærra gengi.