Fyrir rúmum þremur vikum síðan settu stjórnendur Icelandair sér það markmið að fá niðurstöðu í viðræður við stéttarfélög, Boeing, lánveitendur, flugvélaleigusala, birgja og íslensk stjórnvöld þann 15. júní.
Það tókst ekki líkt og fram kom í tilkynningu frá félaginu í gær. Nú er stefnt að því að samkomulag við fyrrnefnda aðila liggi fyrir mánudaginn 29. júní eða hálfum mánuði síðar en upphaflega stóð til. Þann dag átti hlutafjárútboð félagsins hefjast samkvæmt fyrri tímaáætlun.
„Viðræðum við helstu hagaðila miðar að mestu ágætlega. Áhyggjuefni er að samningar hafi ekki náðst við Flugfreyjufélag Íslands en óljóst er hvort lengra verði komist í þeim viðræðum,“ segir í tilkynningunni.
Í því samhengi má rifja upp að í kynningu á hluthafafundi Icelandair 22. maí sagði reyndar að engar viðræður væru í gangi. „Negotiations stopped,“ stóð í kynningunni en hún var haldin tveimur dögum eftir að svokallað lokatilboð félagsins til Flugfreyjufélagið var lagt fram.
En eins og Túristi greindi frá um helgina þá fer samstaðan í hópi flugfreyja og flugþjóna þverrandi í kjaradeilunni.
Hluti af fjárhagslegri endurskipulagningu Icelandair er samkomulag við Boeing vegna MAX flugvélanna og útistandandi bóta vegna kyrrsetningar þeirra. Þessum viðræðum miðar ágætlega að því segir í fyrrnefndri tilkynningu.
Þar kemur jafnframt fram að viðræður við lánveitendur, flugvélaleigusala, færsluhirða, mótaðila í olíuvörnum, birgja og aðra eru í fullum gangi. Þar á meðal íslenskt stjórnvöld.
Tilkynningu Icelandair samsteypunnar lýkur á þeim orðum að náist ekki samkomulag við hagaðila þá verði aðrar leiðir skoðaðar til að ljúka endurskipulagningu félagsins. Túristi hefur óskað eftir nánari útskýringum á því hvaða leiðir eru þar færar.
Í ljósi þess að nú hefur virði eigna almennt rýrnað í heimsfaraldrinum þá má telja ólíklegt að mikið fengist í dag fyrir sölu á eignum og dóttturfélögum. Þannig gæti reynst erfitt að finna kaupendur að lendingarleyfum Icelandair við Heathrow í London. Þau voru líklega milljarða virði fyrir kreppuna og þannig seldi SAS hluta af sínum leyfum til að endurreisa fjárhag sinn á sínum tíma líkt og fjallað var um hér nýverið.
Flugfélög í kröggum hafa líka reglulega gripið til þess að selja flugþjónustudeildir sínar. Í núverandi ástandi er sala á IGS þó varla valkostur fyrir stjórnendur Icelandair.
Túristi mun birta svar Icelandair Group um hvaða aðrar leiðir félagið getur farið í endurfjármögnuninni um leið og það berst.