Streitulosun á Íslandi

Fyrsti hluti kynningarherferðar á vegum Íslandsstofu hefur litið dagsins ljós.

Skjámynd úr nýrri auglýsingu á vegum Inspired by Iceland sem Íslandsstofa hefur umsjón með.

Fyrsti hluti markaðsátaks Íslandsstofu, sem unnið er af bresku auglýsingastofunni M&C Saatchi, var settur í loftið fyrr í dag. Þar er heimsbyggðinni boðið að losa um uppsafnaða streitu vegna Covid-19 með því að láta öskur sitt hljóma hér á landi. Og til koma öskrinu til skila þá hefur hátölurum verið komið fyrir víðs vegar um landið. Í þeim mun svo hljóma öskur sem fólk hefur tekið upp með aðstoð tölvu eða síma á vefsíðunni www.lookslikeyouneediceland.com

Samtals verða það sjö hátalarar sem koma öskrunum til skila á Íslandi og getur fólk valið um staðsetningu. Hátalararnir eru staðsettir í Viðey í Reykjavík, Festarfjall við Grindavík, í nágrenni Skógarfoss, skammt utan við Djúpavog, við rætur Snæfellsjökuls, við Kálfshamarsvík og við Rauðasand á Vestfjörðum. Notendur fá svo að lokum myndbandsupptöku af því þegar öskrið þeirra „glymur“ á Íslandi. Íslendingar þurfa þó ekki að óttast að gremjuöskur útlendinga skemmi sumarfrí þeirra þar sem hljóðstyrknum er stillt í hóf eins og segir í tilkynningu frá Íslandsstofu.

Þar segir jafnframt að ferferðin sem hafi hlotið nafnið „Let It Out“ eða „Losaðu þig við það“ sæki innblástur til kenninga sálfræðinga um streitulosandi áhrif þess að öskra af öllum lífs og sálar kröftum. 

„Í könnun sem framkvæmd var á erlendum mörkuðum fyrir Inspired by Iceland í byrjun júní sögðust fjörutíu prósent aðspurðra finna fyrir streitueinkennum vegna Covid-19, og þrjátíu og sjö prósent svöruðu að ástandið hefði haft neikvæð áhrif á sálartetrið. Langvinn innivera, einsemd, endalausir fjarfundir og röskun á daglegu lífi hefur aukið streitu fólks m.a. takmarkanir á ferðalögum milli landa. Herferðinni er ætlað að draga fram kosti Íslands sem áfangastaðar,” segir í tilkynningu.

„Það er mikilvægt að vekja athygli á kostum Íslands núna. Fólk er að láta sig dreyma um þá tíma þegar það verður hægt að ferðast aftur og jafnvel leggja á ráðin um ferðalög í náinni framtíð. Við viljum vera hluti af því samtali. Streitulosun er viðeigandi við þessar kringumstæður en gefur okkur jafnframt tækifæri á sama tíma til að sýna landið og minna á kosti Íslands,“ segir Sigríður Dögg Guðmundsdóttir, fagstjóri ferðaþjónustu hjá Íslandsstofu. 

Herferðin er hluti af markaðsverkefninu  Ísland – saman í sókn, sem  heyrir undir efnahagsaðgerðir stjórnvalda vegna COVID-19 og er fjármagnað  af  atvinnuvega- o g nýsköpunarráðuneytinu.