Á upplýsingaskjáum evrópskra flugvalla stendur vanalega „cancelled“ við ferðir Icelandair þessa dagana enda eru nærri allar ferðir félagsins felldar niður með tveggja sólarhringa fyrirvara. Samkvæmt athugun Túrista síðustu daga hafa flest önnur evrópsk flugfélög annan hátt á og birta t.d. áætlun viku fram í tímann sem staðið er við.
Spurð um þessa starfshætti Icelandair þá segir Ásdís Pétursdóttir, upplýsingafulltrúi Icelandair, að ferðum sé aflýst með góðum fyrirvara, meira en tveimur vikum fyrir brottför, þegar ljóst er að þær verði alls ekki farnar.
„Þau flug sem farþegar okkar sjá í kerfunum þegar minna en tvær vikur eru í brottför eru hins vegar flug sem við höfum haft von um að geta flogið. En þar sem ástandið er mjög hverfult er fólk oft að breyta áætlunum sínum með skömmum fyrirvara. Þá hafa reglur á landamærum og ferðatakmarkanir innan landa verið að taka breytingum og Íslandi til að mynda verið bætt á rauðan lista í ákveðnum löndum. Til þess að þurfa ekki að breyta og færa farþega margoft, t.d. vegna þess að önnur flugfélög eru að breyta sínum áætlunum með skömmum fyrirvara, vinnum við allar breytingar á þessum flugum þegar minna en 48 tímar eru í brottför,“ segir Ásdís.
Að hennar sögn er þetta gert til þess að tryggja að þeir farþegar sem ætla að fljúga komist á áfangastað. Það sé gert með því að bjóða þeim flug með Icelandair í gegnum aðra áfangastaði eða með öðrum flugfélögum. „Að undanförnu höfum við náð 100% árangri í þessum efnum. Allir farþegar sem ætla sér að ferðast komast á leiðarenda.“ .
Ásdís bætir við að þeir sem ætla sér ekki að ferðast og flugi þeirra hefur verið aflýst geti óskað eftir endurgreiðslu, breytt flugi án breytingagjalds eða þegið ferðainneign sem gildir í þrjú ár.
Til viðbótar geta allir farþegar sem eiga bókað flug hjá Icelandair á næstunni og sjá ekki fram á að ferðast óskað eftir inneign eða breytt ferðaáætluninni.
„Við leggjum áherslu á gott upplýsingaflæði til farþega og ítrekum við alla sem eiga bókað hjá okkur á næstu vikum að við komum þeim á áfangastað óski þeir eftir því þótt flugi þeirra verði aflýst og útskýrum jafnframt aðra möguleika sem standa þeim til boða,“ segir Ásdís.