Stjórnendur American Airlines hafa gefið út að Boeing MAX þotur verði nýttar í ferðir milli New York og Miami í Bandaríkjunum frá og með áramótum. Ennþá eru þó allar flugvélar af þessari tegund kyrrsettar um heim allan en vonir eru bundnar við að bandarísk flugmálayfirvöld veiti flugfélögum heimild til að nota þær á ný fyrir lok þessa árs. Í framhaldinu gætu evrópsk og kanarísk yfirvöld gert slíkt hið sama.
Icelandair á mikið undir því að flugvélarnar komist á loft sem fyrst enda verða þær uppistaðan í flugflota félagsins næstu ár. Á því næsta er þannig gert ráð fyrir að níu af tuttugu og þremur þotum félagsins verði af tegundum MAX8 og MAX9.
Félagið hafði tekið sex þotur í notkun áður flugbannið var sett á í mars í fyrra í kjölfar tveggja flugslysa þar sem 346 manns misstu lífið. Þrjár til viðbótar eru svo tilbúnar til afhendingar við verksmiðjur Boeing.
Hjá Icelandair er þó gert ráð fyrir lengri bið eftir þotunum en hjá American Airlines. Því það er ekki fyrr en 1. mars á næsta ári sem MAX þotur sjást í flugáætlun félagsins. Þá bæði í flugi til borga í Evrópu og í Bandaríkjunum.
Sumaráætlun Icelandair gerir svo ráð fyrir áætlunarferðum til þrjátíu og tveggja borga og til ellefu þeirra verður eingöngu notast við MAX þotur.
Þeir sem fljúga til Gatwick flugvallar í London, Bergen, Billund, Glasgow, Hamborgar, Madríd, Manchester eða Mílanó í sumar hafa þannig aðeins val um flug með Boeing MAX. Ef ferðinni er heitið vestur um haf, nánar tiltekið til Chicago, Montreal eða Newark flugvallar í New York, þá er bara ferðalag með MAX þotu í boði.
Til viðbótar verða þoturnar nýttar í stakar ferðir til Amsterdam, Berlínar, Boston, Brussel, Dublin, Kaupmannahafnar, Óslóar, Parísar og fleiri borga í vor og sumar.
Þau flugfélög sem eiga MAX þotur búa sig nú bæði leynt og ljóst undir það að farþegar muni ekki vilja fara um borð. Þannig hafa stjórnendur United Airlines gefið út farþegar megi breyta flugmiðum sínum ef þeir vilja ekki fljúga með þotunum.
Gera má ráð fyrir að Icelandair muni fyrr en síðar hefja aðgerir til að endurvekja traust almennings á Boeig MAX þotunum.