Flugumferð innan Evrópu hefur aftur dregist saman nú í haust í takt við fjölgun Covid-19 tilfella í álfunni. Þar með hafa farþegatölur á evrópskum flugvöllum á ný farið niður á við. Á Keflavíkurflugvelli fækkaði farþegunum í september þannig um 95,6 prósent en niðursveiflan var minni mánuðina þrjá þar á undan.
Á fjölförnustu norrænu alþjóðaflugvöllunum var samdrátturinn líka verulegur í september en þó minni en á Keflavíkurflugvelli.
Í Ósló fækkaði farþegum um 78,4 prósent en um 83 prósent í Kaupmannahöfn og Arlanda í Stokkhólmi. Hrunið í traffíkinni í Helsinki var meira en þó ekki eins mikið og hér heima eins og sjá má á töflunni hér fyrir neðan.
Það sem dregur úr fallinu á hinum flugvöllunum er sú staðreynd að umsvifin þar takmarkast ekki við millilandsflug eins og á Keflavíkurflugvelli. Innanlandsflug hefur nefnilega dregist minna saman í kórónuveirukreppunni en alþjóðaflug.
Hér heima er það líka raunin því umferðin um Reykjavíkurflugvöll minnkaði rétt um helming í síðasta mánuði. Ef öll um ferðin um þann völl hefið verið á Keflavíkurflugvelli í september þá hefði samdrátturinn þar verið ögn minni eða 93,5 prósent í 95,6 prósenta.