Fyrir tveimur vikum síðan leituðu forráðamenn Travelco Nordic eftir greiðsluskjóli í Danmörku. Þetta danska félag er í eigu Arion banka sem tók það yfir sumarið 2019 í uppgjöri sínu við Andra Má Ingólfsson. Sá er oft kenndur við Heimsferðir.
Sú ferðaskrifstofa hefur lengi verið ein sú stærsta hér á landi og heyrir einmitt undir Travelco Nordic líkt og fimm aðrar norrænar ferðaskrifstofur.
Áður voru þær hluti af hinu íslenska Primera Travel veldi Andra Más. Eignarhaldið var hins vegar flutt til Danmerkur eftir að flugfélagið Primera Air varð gjaldþrota fyrir tveimur árum síðan.
Það hefur verið yfirlýst markmið Arion banka að selja ferðaskrifstofurnar en aðeins tókst að selja eina þeirra. Möguleikinn á að koma hinum ferðaskrifstofumum í verð hefur skiljanlega versnað mjög í ár.
Nú hafa lögmennirnir sem danski skiptarétturinn skipaði sem umsjónarmenn Travelco Nordic tekið við söluferlinu. Þannig hefur vefritið Standby það eftir öðrum þeirra að fresturinn til að leggja inn tilboð í Travelco í heild sinni eða í einstakar ferðaskrifstofur renni út klukkan 12 að dönskum tíma í dag. Þá er klukkan aðeins tíu hér á Íslandi.
Að sögn umsjónarmannsins þá hefur fyrirtækjunum verið sýndur áhugi. Peder Hornshøj, framkvæmdastjóri Traveco Nordic og stofnandi Bravo tours, sem er stærsta ferðaskrifstofan innan samsteypunnar, vill þó ekki segja nokkuð um það við Standby hvort hann hyggist bjóða í danska hluta veldisins.
Það hefur aftur á móti komið fram í máli Hornshøj að rekstur ferðaskrifstofa samstæðunnar utan Danmerkur hafi gengið verr en þeirra dönsku. En auk Heimsferða og Bravo tours þá heyrir Solia í Noregi undir Travelco Nordic og það gera líka Solresor í Svíþjóð, Matkavekka í Finnlandi og Sun Tours í Danmörku.
Íslenska ferðaskrifstofan Terra Nova var aftur á móti seld út úr samstæðunni í fyrra til íslenska ferðaþjónustufyrirtækisins Nordic Visitor. Um þau viðskipti var meðal annars rætt í viðtali Túrista við Ásberg Jónsson, eiganda Nordic Visitor í upphafi kórónuveirukreppunnar.
