Þegar kröfuhafar Norwegian eignuðust meirihluta í flugfélaginu í vor þá skuldbundu þeir sig til að halda í hlutabréfin í ákveðinn tíma. Í dag losnaði um hluta af bréfunum eða samtals 900 milljón hluti. Það jafngildir um einum sjötta af öllum útgefnum hlutum í flugfélaginu.
Og líkt og sérfræðingar höfðu gert ráð fyrir þá féll gengi Norwegian í dag. Það er nefnilega ekki margt sem vinnur með félaginu nú um stundir og forstjórinn hefur viðurkennt að viðbótar fjármagns sé þörf til að koma því í gegnum veturinn. Í ofan á lag þá eru flugvélaleigur stærstu eigendur Norwegian í dag. Þess háttar eiga alla jafna eiga ekki hlut í flugfélögum og vísbendingar um að þær ætli sér flestar að selja sín bréf sem fyrst.
Niðurstaða dagsins var því 24 prósent lækkun á gengi hlutabréfa norska flugfélagsins. Ekki bætti úr skák að seinni partinn í dag gaf Norwegian út að framundan væri niðurskurður á starfseminni á Gatwick flugvelli í London. Félagið ætlar leggja niður flug þaðan á styttri leiðum og í staðinn einbeita sér að ferðum frá London til Bandaríkjanna.
Fastlega má gera ráð fyrir að stjórnendur Icelandair bindi þó vonir við að Norwegian dragi verulega úr flugi sínu yfir Norður-Atlantshafið. Þar hafa Norðmennirnir nefnilega verið mjög umsvifamiklir og sett mikla pressu á fargjöldin. Eins hafa þeir veitt Icelandair harða samkeppni í flugi til og frá borgum vestanhafs eins og Seattle, Denver og Boston.