Tíðar ferðir til Bandaríkjanna eru ein af undirstöðunum í rekstri Icelandair. Botninn datt því úr flugáætlun félagsins þann 12. mars sl. þegar Donald J. Trump, forseti Bandaríkjanna, bannaði allar ferðir til landsins frá Evrópu. Daginn eftir gaf Isavia það út að öll notendagjöld á Keflavíkurflugvelli yrðu felld niður tímabundið.
Þá var flugfélögum tilkynnt að þessi ákvörðun myndi gilda til loka maí en síðan var framlengt til 31. júlí. Frá 1. ágúst hefur svo verið innheimt samkvæmt notendagjaldskrá samkvæmt svari frá Isavia.
Á þessu sextán vikna tímabili sem gjaldtakan lá niðri þá sparaði Icelandair sér 2,6 milljónir dollara. Þetta kemur fram í nýjasta uppgjöri félagsins sem birt var í vikunni. Sú upphæð jafngildir 367 milljónum króna á gengi dagsins í dag.
Sem fyrr segir þá hafa flugfélög verið rukkuð fyrir afnot af Keflavíkurflugvelli frá 1. ágúst en flugumferð um völlinn hefur dregist mun meira saman en til að mynda á flugvöllum frændþjóðanna.