Það voru rétt um 1,3 milljónir farþega sem áttu leið um Keflavíkurflugvöll fyrstu níu mánuði ársins. Það er fækkun um 77 prósent frá sama tíma í fyrra og meiri samdráttur en varð á stærstu flugvöllum Norðurlandanna á sama tíma.
Skýringin á því liggur að miklu leyti í þeirri staðreynd að umsvifin á Keflavíkurflugvelli takmarkast við millilandaflug. Hjá öðrum þjóðum er innanlands- og alþjóðaflug ekki aðskilið með sama hætti og tíðkast hér á landi. Og í núverandi kreppu þá hefur niðursveiflan í ferðum innanlands verið mun minni en utanlandsferðum.
Þetta endurspeglast í farþegatölum minni flugvalla í Noregi þar sem umferðin er vissulega miklu minni en áður en samt hlutfallslega meiri en á Keflavíkurflugvelli.
Í Þrándheimi, Stafangri og Bergen er samdrátturinn mun minni en víða annars staðar og farþegahópurinn á þessum þremur norsku flugvöllum í ár er orðinn stærri en á Keflavíkurflugvelli. Sömu sögu er að segja af Landvetter í Gautaborg.
Þar með fellur Keflavíkurflugvöllur úr fimmta sæti niður í það níunda á listanum yfir fjölförnustu flughafnir Norðurlanda.
