Fyrirtæki með ferðaskrifstofuleyfi geta fram til mánaðamóta óskað eftir láni í Ferðaábyrgðasjóð. Lánin eru veitt til auðvelda fyrirtækjum að endurgreiða viðskiptavinum pakkaferðir sem voru á dagskrá á tímabilinu 12. mars til 30. september í ár. Er þá horft til ferða sem var aflýst eða þær afpantaðar vegna aðstæðna sem ríkt hafa síðustu misseri.
Það er Ferðamálastofa sem sér um sjóðinn og sótt er um lán í gegnum þjónustugátt á vef stofnunarinnar. Þann 1. nóvember nk. hyggst Ferðamálastofa hefja formlegt eftirlit með lánveitingum úr sjóðnum.
Nú þegar hafa borist fimmtíu umsóknir um lán upp á samtals 2,3 milljarða króna úr Ferðaábyrgðasjóði. Samþykki hefur verið veitt fyrir lánum upp á rétt rúma 2 milljarða króna.
