Bandaríski vogunarsjóðurinn PAR Capital seldi allan hlut sinn í Icelandair Group í lok síðustu viku. Sjóðurinn átti þá um 1,5 prósent hlut í samsteypunni. Í fyrradag var birtur nýr listi yfir stærstu hluthafa Icelandair Group, á heimsíðu fyrirtækisins, og sá var jafnframt sá fyrsti sem birst hafði eftir sölu brotthvarf PAR Capital út hluthafahópnum.
Túristi birti svo í gærkvöld grein sem byggði á þessum lista en af honum að dæma þá hafði Arion banki og lífeyrissjóðurinn Brú bætt við sig mörg hundruð hlutum í Icelandair. Eign Lífeyrissjóðs verzlunarmanna átti sömuleiðis að hafa aukist um eitt hundrað milljón hluti en gengi bréfa Icelandair hefur verið rétt tæplega ein króna á hlut í síðustu daga.
Lífeyrissjóður verzlunarmanna tók ekki þátt hlutafjárútboði Icelandair í síðasta mánuði þrátt fyrir að sjóðurinn hafi lengi verið meðal allra stærstu hluthafa félagsins. Og sjóðurinn keypti ekki við ný hlutabréf í Icelandair í síðustu viku eins og halda mátti af lista Icelandair. Þetta staðfestir Þórhallur Jósepsson, upplýsingafulltrúi Lífeyrissjóðs verzlunarmanna, í svari til Túrista Hann bætti því við að Icelandair hefði verið látið vita að upplýsingarnar á heimasíðu félagsins væru rangar.
Og nú hefur listinn yfir stærstu hluthafana verið leiðréttur og hér fyrir neðan má sjá hvaða breytingar hafa orðið á eign tuttugu stærstu hluthafa félagsins frá því að útboðinu lauk. Þær eru langtum minni en halda mátti af fyrri listanum en PAR Capital er vissulega dottið út og sömuleiðis Kvika. Hlutur Landsbankans hefur dregist saman en skýringin á því kann að liggja í því að bankinn sá um uppgjör útboðsins.
Tveir nýir sjóðir eru núna á listanum yfir stærstu hluthafana. Um er að ræða sjóð á vegum verðbréfafyrirtækisins Akta og annan sem Íslandssjóðir, dótturfélag Íslandsbanka, rekur.
