Í uppgjöri Arion banka og Andra Más Ingólfssonar í sumarbyrjun í fyrra þá tók bankinn yfir danska eignarhaldsfélagið Travelco Nordic. Sjö ferðaskrifstofur á öllum fimm Norðurlöndunum, sem áður voru reknar undir merkjum Primera Travel Group, tilheyrðu þessu danska eignarhaldsfélagi.
Við yfirtökuna á ferðaskrifstofunum var það yfirlýst markmið bankans að koma þeim í hendur annarra sem fyrst. Aðeins ein þeirra, Terra Nova, seldist áður en heimsfaraldurinn hófst og fjárfestingar í ferðaþjónustu duttu upp fyrir. Fyrr í þessum mánuði óskuðu svo forráðamenn Travelco Nordic eftir greiðsluskjóli í Danmörku sem þeir fengu.
Í beinu framhaldi leituðu skipaðir umsjónarmenn fyrirtækisins eftir tilboðum í eignir þess og í gær sögðu danskir fjölmiðlar frá sölu á Bravo Tours. Á þeim tímapunkti lá þó ekki fyrir hver keypti og þær upplýsingar fékk Túristi ekki hjá danska skiptastjóranum né stjórnarformanni Travelco.
Nú liggur þó fyrir að Arion banki er ekki laus allra mála í Danmörku því félagið Sólbjarg, sem eigu bankans, heldur 50 til 66 prósent hlut í Bravo Tours. Benedikt Gíslason, bankastjóri Arion er stjórnarformaður Sólbjargs.
Ferðaskrifstofan Sunway Group í Árósum eignast um þriðjung og Peder Hornshøj, stofnandi og framkvæmdastjóri Bravo Tours, verður einnig meðeigandi. Nánari skipting liggur ekki fyrir.
Túristi fær ekki svör frá Arion um hvort bankinn hafi þurft að leggja meira fé í rekstur Bravo Tours við þessar breytingu. Nýir meðeigendur bankans eru þó til í að tjá sig um viðskiptin og í viðtali við ferðaritið Standby segir Hornshøj framkvæmdastjóri að það sé nægt fjármagn í fyrirtækinu til að koma því í gegnum langvarandi heimsfaraldur.
Hann bætir því við að hann sé stoltur yfir því að íslenski bankinn hafi ákveðið að halda áfram með Bravo Tours. Þrátt fyrir að Travelco Nordic muni kosta Arion banka ógrynni af peningum eins og hann kemst að orði.
Þó Arion banki verði stærsti eigandinn í Bravo Tours þá er það Mads Bygballe Christiansen, eigandi Sunway Tours, sem verður stjórnarformaður. Sá segir, í viðtali við Standby, að fulltrúar Arion banka hefðu haft samband við sig í síðustu viku þar sem þeir vildu fá fleiri danska meðeigendur að rekstrinum.
Það munu hafa borist tíu til tólf tilboð í Bravo Tours en sú ferðaskrifstofa var sú stærsta innan Travelco Nordic. Til þess fyrirtækis heyra nú aðeins fjórar aðrar ferðaskrifstofur því líkt og fram kom hér á Túrista í gær hefur eignarhaldið á Heimsferðum verið flutt úr danska félaginu og beint undir Arion banka. Sú ferðaskrifstofa hefur lengi verið ein sú allra stærsta á íslenska markaðnum.