Það voru aðeins farnar 56 áætlunarferðir frá Keflavíkurflugvelli fyrstu tíu dagana í október. Brottfarirnar voru aftur á móti 96 talsins á sama tíma í september. Samdrátturinn nemur því 42 prósentum á milli mánaða. Umferðin það sem af er október er rétt um fjórðungur af því sem var fyrstu tíu dagana ágúst.
Icelandair stóð undir sextán af ferðunum 56 og vægi félagsins því 29 prósent sem er það sama og í síðasta mánuði. Þetta er þó mun lægri hlutdeild en Icelandair er vant að vera með en til samanburðar var hún 64 prósent í október í fyrra.
Þrátt fyrir samdráttinn þá er Icelandair það félag sem flaug oftast til og frá landinu fyrstu tíu dagana í mánuðinum. Þar á eftir kom easyJet og svo Wizz Air eins og sjá má á súluritinu hér fyrir neðan.