„Við berjumst fyrir áframhaldandi lífi ferðaskrifstofanna en núna er peningakassinn tómur og eigandinn verður að leita annarra lausna,“ segir Peder Hornshøj, framkvæmdastjóri Travelco Nordic, í viðtali við Standby í Danmörku í dag.
Travelco Nordic er skráð þar í landi og er móðurfélag norrænu ferðaskrifstofanna sem áður tilheyrðu Primera Travel samsteypu Andra Más Ingólfssonar, stofnanda Heimsferða. Arion banki tók reksturinn yfir sumarið 2019 en í dag óskuðu forsvarsmenn félagsins eftir greiðsluskjóli hjá dönskum yfirvöldum.
Jón Karl Ólafsson, stjórnarformaður Travelco Nordic segir, í samtali við Túrista, að þetta hafi verið erfitt en nauðsynlegt skref. „Áfram er ætlunin að selja reksturinn og vonandi kemst hann í söluvænlegra horf í framhaldinu,“ segir Jón Karl. Hann staðfestir að staða Travelco Nordic hafi engin áhrif á rekstur Heimsferða hér landi þó það fyrirtæki sé hluti af samstæðunni. „Peningakassinn er ekki tómur þar,“ bætir hann við.