Norlandair fékk úthlutað áætlunarflugi fyrir Vegagerðina til Gjögurs, Bíldudals og Hafnar í Hornafirði í byrjun september. Þá niðurstöðu kærði Flugfélagið Ernir og ennþá liggur ekki fyrir hvort flugfélagið mun sjá um ferðirnar næstu þrjú ár.
Hefja á flug samkvæmt nýja fyrirkomulaginu um mánaðamótin og fyrirvarinn sem flugfélögin hafa til að hefja sölu á farmiðum styttist því hratt.
G. Pétur Matthíasson, upplýsingafulltrúi Vegagerðarinnar, segir í svari til Túrista að málið sé ennþá í kæruferli og ekki sé komin niðurstaða í hvernig málum verður háttað. Hann segir þó að unnið sé hörðum höndum að því að finna lausn.
Spurður hvort Vegagerðin muni styðja við flugreksturinn í upphafi, í ljósi þess tímafrekt ferlið hefur verið, þá segir G. Pétur að ekki hafi verið tekin ákvörðun um slíkt.
Eins og Túristi fjallaði um í sumar þá átti Flugfélag Austurlands lægstu tilboðin í flugið til Gjögurs, Bíldudals og Hafnar í Hornafirði. Tilboð félagsins þótti þó ekki uppfylla skilmála útboðsins og Ríkiskaup komst að sömu niðurstöðu varðandi tilboð Ernis.
Norlandair varð því fyrir valinu en tilboð félagsins í flugið til Gjögurs og Bíldudals var mun lægra en tilboðs Ernis. Því var svo öfugt farið varðandi flugið til Hafnar í Hornafirði.
