Á meðan Icelandair hefur sérhæft sig í tíðum ferðum til fjölda áfangastaða í Norður-Ameríku þá hefur fókusinn hjá Finnair verið á Asíu. Þotur félagsins fljúga þannig reglulega til fjölda borga í Kína, Japan og S-Kóreu. Heimsfaraldurinn sem nú gengur yfir takmarkar hins vegar mjög umsvif í ferðum milli heimsálfa og tekjur Finnair á þriðja fjórðungi ársins drógust saman um 89 prósent.
Til samanburðar nam tekjusamdrátturinn hjá Icelandair 81 prósenti á þessu sama tímabili. Afkoma Icelandair var þó í plús vegna bótagreiðslna frá Boeing, eignfærslu á tekjuskatti og endurflokkun eldsneytisvarna eins og segir í tilkynningu sem félagið sendi frá sér í fyrradag.
Finnarnir höfðu þó enga svona liði í sínum bókum til að rétta afkomuna af. Þar á bæ varð niðurstaðan því tap upp á 30 milljarða íslenskra króna á þriðja ársfjóðrungi samkvæmt uppgjöri félagsins sem birt var í morgun.
Í tilkynningu er haft eftir Topi Manners, forstjóra Finnair, að fraktflutningar séu í raun eini hluti starfseminnar þar sem eftirspurn er góð. Hann segir jafnframt að félagið ætli sér að skera kostnað niður um 140 milljónir evra, um 23 milljarða króna, fyrir ársbyrjun 2022. Þetta er töluverð viðbót við það sem áður hafði verið tilkynnt um.
Fækkun starfsfólks vegur þungt í niðurskurðinum en nýverið var tilkynnt um uppsagnir sjö hundruð starfsmanna félagsins. Í heildina hefur þá fækkað í starfsliði Finnair um ellefu hundruð manns frá því í byrjun þessa árs.
