Þúsundir Íslendinga dvelja í lengri eða skemmri tíma á Kanaríeyjum yfir vetrarmánuðina og jólaferðir þangað seljast vanalega upp með góðum fyrirvara. Til marks um það þá hafði sala á ferðum til Tenerife og Gran Canaria farið vel af stað áður en heimsfaraldurinn setti flest úr skorðum í mars.
Það eru því vafalítið margir Íslendingar sem eiga bókað far út til Kanaríeyja í desember. Fyrir þann hóp eru það jákvæð tíðindi að útbreiðsla Covid-19 á Tenerife og Gran Canaria hefur minnkað töluvert síðustu vikur. Á þeirri fyrrnefndu voru smitin komin niður 109 á hverja 100 þúsund íbúa nú í byrjun vikunnar en tíðnin er helmingi lægri á Gran Canaria.
Spænsk stjórnvöld vinna nú að því að einfalda fólki ferðalagið til eyjanna og liður í því er að koma á einskonar loftbrú til helstu markaðssvæða í norðurhluta Evrópu. Sendiherra Spánar í Noregi, sem einnig er sendiherra landsins gagnvart Íslandi, staðfestir í svari til Túrista áhuga Spánverja á að koma á þess háttar samstarfi við Íslendinga.
Sú leið sem spænsk stjórnvöld leggja til er að ferðafólk frá löndum þar sem smit eru færri en fimmtíu á hverja eitt hundrað þúsund íbúa verði ekki að fara í nein próf fyrir ferðalagið út.
Ef tíðni nýrra smita er hærri en fimmtíu þá verða farþegar að fara í próf tveimur sólarhringum fyrir brottför og niðurstaðan verður að sjálfsögðu að vera neikvæð. Nýgengi smita hér á landi í dag er 213.
Fyrir heimferðina frá Kanaríeyjum verða svo allir ferðamenn að láta skima sig í mesta lagi tveimur dögum fyrir heimferðina. Ef fólk smitast á meðan á dvölinni úti stendur þá sjá spænsk stjórnvöld þeim fyrir aðstöðu og uppihaldi í tengslum við sóttkví. Spánverjar ábyrgjast einnig læknisaðstoð fyrir þá sem þurfa á þess háttar að halda.
